ئیران هۆشداریێ ددەتە وەلاتێن عەرەبی
چەند بەرپرسێن وەلاتێن عەرەبی کو ناڤێ وان نەهاتینە ئاشکرا کرن بۆ رۆژناما واشنتۆن پۆست یا ئەمریکی دیار کرینە، ئیرانێ ب رێیا بالیۆزێن خوە ل وان وەلاتان هۆشداری دایە وەلاتێن عەرەبی هەکە ئسرائیل ئەسمانێ وان وەلاتان بۆ لێدانا ئیرانێ بکار بینیت ئیران دێ ئێرشی وان وەلاتان کەت و دێ ب توندی وان سزا دەت.
ل گۆر هەمان رۆژنامێ ئیرانێ هۆشداری دایە ئەمریکا ژی کو نابیت ب چو رەنگەکێ پشتەڤانیێ ل ئێرشەکا نوو یا ئسرائیلێ بۆ سەر ئیرانێ بکەت، هەر ئێرشەکا نوو یا ئسرائیلێ ل سەر ئیرانێ دێ بیتە ئەگەرێ ئالۆزیێن نوو ل رۆژهەلاتا ناڤین و ئیران ل هەمبەر گەف و ئێرشێن ئسرائیلێ دێ یا پێدڤی کەت، ژ بەر ڤێ یەکێ ژی دڤێت ئەمریکا نەهێلیت ئسرائیل دەست ب کارەکێ وەسا مەترسیدار بکەت، چونکی ئەو یەک د بەرژەوندیا ئەمریکا و چو وەلاتەکێ دی یێ دەڤەرێ دا نینە، ژ بەر ڤێ یەکێ دڤێت وەلاتێن عەرەبی ژی هاریکاریا ئسرائیلێ نەکەن.
