ئیران هەموو کارتێن هەی ل دژی ئەمریکا و ئسرائیلێ بکار دئینیت
ب، سهرجان مەحمود:
چاڤدێرێن سیاسی دیار دکەن حوسیێن یەمەنێ ژی ب موشەکان ئێرشی ئسرائیلێ کرن و ئەو یەک نیشا ددەن کو ئیران نها هەموو کارتێن هەی بکار دئینیت و ژ بەر ڤێ یەکێ ژی دێ شەڕ دژوارتر لێ هێت و دێ کاریگەریا خوە ل هەموو جیهانێ کەت.
د. هێمن سەیدی بسپۆرێ کاروبارێن ئیرانێ دیار کر، ئیران ب هەموو شیانێن خوە شەڕی دکەت و کار بۆ مانا خوە دکەت، ئیران یێ هەموو کارتێن د دەستان دا بکار دئینیت و هەری دووماهیێ ژی وەکو بارسڤکی داخواز ژ حوسیێن یەمەنێ کر کو ئێرشی ئسرائیلێ بکەن و ئێرشا موشەکی یا حوسییان ل دژی ئسرائیلێ نیشا ددەت کو شەڕ بەرفرەهتر لێ هاتیە و گۆت: (د رەوشا نها دا هەموو هێز و گرۆپێن سەر ب ئیرانێ د شەڕی دانە و ل هەمبەر دا ئسرائیل و ئەمریکا ژی ب توندی ئێرشی ئیرانێ دکەن و د چەند رۆژێن بۆری دا گەلەک عومبارێن چەکی یێن ئیرانێ هاتینە ژناڤبرن، دیارە ئسرائیل و ئەمریکا دخوازن چەکێ گران یێ ئیرانێ ژناڤ ببەن و ل هەمبەر دا ئیران ژی گەفا ئێرشێن دژوارتر دکەت).
ناڤهاتی ئەو یەک ژی دیار کر، هەری دووماهیێ ئیرانێ گەف ل سووریێ ژی کرن، چونکی دەستهەلاتا ئیرانێ ئەحمەد شەرعی وەکو هەڤپەیمانێ ئەمریکا دبینیت و گەفا ڤێ یەکێ کریە کو دێ ئێرشی کۆچکا سەرۆک کۆماریا سووریێ کەت، هەکە تشتەک وەسا روو بدەت دبیت هێزێن سەر ب ئەحمەد شەرعی ژی ئێرشی حزبوللا لوبنانێ بکەن و هەکە تشتەک وەسا روو بدەت دێ رۆژهەلاتا ناڤین ب گشتی بیتە مەیدانا شەڕەکێ دژوار و گۆت: (هەکە ئێرشێن ئیرانێ ل دژی وەلاتێن عەرەبی وەسا ب دژواری بەردەوام بکەن دبیت هەڤپەیمانیەکا نوو ژی دروست ببیت و وەلاتێن عەرەبی ژی ب فەرمی پشكداریێ د شەڕی دا بکەن، چونکی هەکە ئیران لاوازتر لێ بهێت دێ مەترسیێن ل سەر وەلاتێن عەرەبی کێم بن و وی دەمی دێ رەوشەکا نوو هێتە پێش).
جەنگ ساغنج بسپۆرێ کاروبارێ سیاسی ژی دیار کر، ئەمریکا و ئسرائیل یێ کار دکەن دا بگەهنە ئارمانجێن خوە، هەرچەندە هندەک جاران ترامپ داخویانیێن جودا ددەت، لێ هەر کەس دزانیت هەتا ئەمریکا نەگەهیتە ئارمانجێن خوە دێ شەڕ ژی بەردەوام بیت، چونکی راگرتنا شەڕی د رەوشا نها یا ئالۆز دا ب تەمامی ل دژی بەرژەوەندیێن ئەمریکا یە، ل ئالیێ دی ئیرانێ ژی دڤێت هەتا ژ دەستێ وێ دهێت زیانێ بگەهینتە بەرژەوەندیێن ئەمریکا و ژ بەر ڤێ یەکێ ژی دێ شەڕ دژوارتر لێ هێت و گۆت: (حوسیێن یەمەنێ ژی نها ئێرش کرن و ئەو یەک ژی نیشا ددەت ئسرائیل و ئەمریکا دێ ئێرشی حوسییان ژی کەن، ل ئالیێ دی حوسی دشێن ئێرشی عەرەبستانا سعوودیێ ژی بکەن، ئەو یەک دێ بیتە ئەگەر شەڕ دەربازی قووناغەکا دی بیت).
ل ئالیێ دی دوهی عەباس ئیراقچی وەزیرێ دەرڤە یێ ئیرانێ ژی دیار کر، باوەریا وان ب سۆزێن ئەمریکا ناهێت و دەمێ ئەو بەحسێ دانوستاندنان دکەن ئەم دبینین کو رۆژا دی ئێرشێن دژوار دکەنە سەر ئیرانێ، ژ بەر ڤێ یەکێ ژی وەکو ئیران ئەو دێ ب هەموو رەنگەکێ بەرسڤا ئێرشان دەن و هەر وەلاتەک ژی پشتەڤانیێ ل ئەمریکا بکەت دێ بیتە ئارمانجا ئێرشێن ئیرانێ.
محەمەد باقر قالیباف سەرۆکێ پەرلەمانێ ئیرانێ ژی دیار کر، دڤێت ئەمریکا و ئسرائیل قەرەبۆیا ئێرشێن ل سەر ئیرانێ بکەن و بابەت ئاگربەست تنێ نینە، بەلکو دڤێت گەرەنتیا ڤێ یەکێ ژی بدەنە ئیرانێ کو جارەکا دی ئەو ئێرش نەکەن، د هەمان دەمی دا نها هەموو هێزێن ئیرانێ ژی د ئامادەباشیێ دانە و هەکە هێزێن ئەمریکا دەربازی ئاخا ئیرانێ ببن دێ ژناڤ چن، ژ بەر ڤێ یەکێ ژی باشترە ئەمریکا و ب تایبەتی ژی ترامپ هزرا هەر تشتەکێ بکەت.
دەزگەهێن راگەهاندنا ئەمریکا ژی دیار دکەن، هەکە رژێما نها یا ئیرانێ نەهێتە گوهۆڕین، ئیران دشێت پشتی دەمەکێ مەترسیێن گەلەک مەزن بۆ بەرژەوەندیێن ئەمریکا ل رۆژهەلاتا ناڤین دروست بکەت، راگرتنا شەڕی و رێککەفتن ل گەل دەستهەلاتا نها یا ئیرانێ دێ زیانێن خوە یێن گەلەک مەزن بۆ ئەمریکا هەبن و دڤێت شەڕێ ل دژی ئیرانێ ب توندی بەردەوام بیت.
