ئیران و ئەمریکا ل دۆر دانوستاندنان داخۆیانیێن جودا ددەن
مارکۆ رۆبیۆ وەزیرێ دەرڤە یێ ئەمریکا دیار کر، دانوستاندنێن ل گەل ئیرانێ هەتا نها چو ئەنجامێن خوە نەبووینە، چونکی ئیرانێ هەتا نها ژی مەرجێن ئەمریکا قەبوول نەکرینە و ئەمریکا دەلیڤە دایە ئیرانێ دا بریارا خوە بدەت و هەکە ب رێیا دانوستاندنان پرسێن ل گەل ئیرانێ نەهێنە چارەسەرکرن دێ ئەمریکا رێیێن دی ل دژی ئیرانێ بکار ئینیت و ئەو یەک ب رەنگەکێ ئاشکرا بۆ بەرپرسێن ئیرانێ ژی هاتیە گۆتن.
ل ئالیێ دی ئیسماعیل بەقایی پەیڤدارێ وەزارەتا دەرڤە یا ئیرانێ ژی دیار کر، هەڤدیتنێن ل گەل ئەمریکا ل جنێڤێ باش بوون و هەلوەستێ ئەمریکا ژی هاتیە گوهۆڕین و ئیرانێ ب رەنگەکێ ئاشکرا دیار کریە دڤێت ئەمریکا دەست ژ گەفکرنێ بەردەت و گرنگە سزایێن ل سەر ئیرانێ ژی بهێنە راکرن، هەکە سزایێن ل سەر ئیرانێ بهێنە راکرن وی دەمی ئیران ژی بەرهەڤە ل دۆر بەرنامێ ئەتۆمی ل گەل ئەمریکا دانوستاندنان بکەت.
چاڤدێرێن سیاسی ژی دیار دکەن، ئیران و ئەمریکا ل دۆر دانوستاندنان داخویانیێن جودا ددەن، ئەو یەک ژی نیشا ددەت هێشتا هەر دو ئالی گەلەک ژێک دوورن و ئسرائیلێ ژی دڤێت هەر رێککەفتنەکا ل گەل ئیرانێ بهێتە کرن ب دلێ وێ بیت، ژ بەر ڤێ یەکێ ژی د رەوشا نها دا گەلەک زەحمەتە رێککەفتنەک د ناڤبەرا ئیرانێ و ئەمریکا دا بهێتە ئیمزا کرن.
