ئیران و رۆسیا دخوازن پەیوەندیێن خوە ل گەل سووریێ باش بکەن
بەرپرسەکێ وەزارەتا دەرڤە یا رۆسیا دیار کریە، وان دڤێت ل گەل دەستهەلاتا نوو یا سووریێ دەست ب قۆناغەکا نوو بکەن و ژ بۆ ڤێ یەکێ ژی نها د ئاستێ وەزارەتا دەرڤە دا هندەک کار دهێنە کرن و ل ئالیێ دی بەرپرسەکێ ئیرانێ ژی دیار کریە دڤێت ل گۆر راستیا نها ل سووریێ کار بکەین.
بەرپرسەکێ وەزارەتا دەرڤە یا رۆسیا کو نەخواستیە ناڤێ وی بهێتە ئاشکرا کرن بۆ ئاژانسا سپۆتینگ یا وەلاتێ خوە دیار کریە، نها ل سووریێ رەوشەکا نوو هاتیە پێش، ئێدی دڤێت رۆسیا ژی ل گۆر راستیا نها سیاسەتێ بکەت، سووریێ ژ بۆ رۆسیا گەلەک یا گرنگە و نابیت رۆسیا دەست ژ سووریێ بەردەت، بهێزبوونا ئەمریکا و دژبەرێن رۆسیا ل سووریێ دشێت د پاشەرۆژێ دا ئاریشەیێن دی یێن مەزن بۆ بەرژەوەندیێن رۆسیا دروست بکەت، ژ بەر ڤێ یەکێ ژی رۆسیا دشێت ل گۆر راستیا نها یا سووریێ ل گەل شامێ دەست ب قۆناغەکا نوو بکەت.
هەمان بەرپرسی ئەو یەک ژی دیار کریە نها د ئاستێ وەزارەتا دەرڤە دا ل گەل دەستهەلاتا نوو یا شامێ پەیوەندی هەنە و هندەک کارێن گرنگ ژی دهێنە کرن، بێگومان دەستهەلاتا نوو یا شامێ ژی پێدڤیا خوە ب پشتەڤانیا رۆسیا هەیە و ئەو یەک ژی کارتەکا گرنگە د دەستێ رۆسیا دا.
ل ئالیێ دی محەمەد جەواد زەریف جێگرێ سەرۆک کۆمارێ ئیرانێ ژی راگەهاند، مخابن ژناڤچوونا دەستهەلاتا بەشاری د دەمەکێ وەسا دا کو گەلەک فشار ل سەر ئیرانێ هەنە گەلەک خراب بوو، لێ ئەو یەک رامانا هندێ ژی نادەت کو دێ ئیران دەست ژ سووریێ بەردەت، راستە نها دەستهەلاتەکا جودا ل شامێ هەیە لێ ئەو ژی نەشێن وەکو دخوازن حوکمێ ل هەموو سووریێ بکەن، ل سووریێ گەلەک پێکهاتەیێن جودا هەنە، ئانکۆ دەستهەلاتا نها یا ل شامێ گەلەک لاوازە و ئەو یەک ژی دەلیڤەکا گرنگە کو ئیران دشێت ل گۆر راستیا هەی ل گەل دەستهەلاتا نها پەیوەندیان دروست بکەت.
ناڤهاتی ئەو یەک ژی دیار کر، بەرژەوەندیێن ئیرانێ وەسا دڤێت کو ل گەل شامێ پەیوەندیان دروست بکەت، هەکە ئیران ب تەمامی خوە ژ دەستهەلاتا نها یا ل شامێ دوور بکەت ئەو یەک دێ ئەنجامێن خوە یێن گەلەک خراب بۆ ئیرانێ هەبن، چونکی هندەک وەلاتێن دی یێن رۆژهەلاتا ناڤین دخوازن سووریێ بۆ بهێزکرنا پێگەهێ خوە بکار بینن و بێگومان د دەمەکێ وەسا دا ئەو دێ کار بۆ لاوازکرنا پێگەهێ ئیرانێ ل دەڤەرێ کەن، دڤێت وەکو ئیران ئەم رێ نەدەین تشتەک وەسا روو بدەت، د سیاسەتێ دا هەر کەس بۆ بەرژەوەندیێن خوە کار دکەت و وەکو ئیران دڤێت ئەم ژ بۆ پاراستنا بەرژەوەندیێن خوە ل گەل دەستهەلاتا نوو یا شامێ دانوستاندنان بکەین.
