ئیران و كۆر‌یا باكور مه‌ترسینه بۆ رۆژنامه‌ڤانان
ب سه‌رجان مه‌حمود:
رێكخستنا رۆژنامه‌ڤانێن بێ سنۆر راگه‌هاند كو ره‌وشا رۆژنامه‌ڤانان ل دووڤ سالێن بۆری خرابتر بوویه و ل گه‌له‌ك وه‌لاتان ژیانا رۆژنامه‌ڤانان د مه‌ترسیێ دایه و ئاسته‌نگیێن مه‌زن ل سه‌ر كارێن رۆژنامه‌ڤانیێ هه‌نه، هژماره‌ك زێده ده‌ستهه‌لاتدارێن دكتاتۆر و نه دیموكرات ژ كارێن رۆژنامه‌ڤانان دترسن و بۆ ڤێ چه‌ندێ هه‌ول دده‌ن رۆژنامه‌ڤانان و ده‌زگه‌هێن راگه‌هاندنێ بكه‌نه ژێر كۆنترۆلا خوه و ب ته‌مامی رۆژنامه‌ڤانیا ئازاد ژناڤ ببه‌ن ژ به‌ر كو دخوازن جڤاك و رایا گشتی راستیان نه‌زانن و ل دووڤ داخوازیێن ده‌ستهه‌لاتێ ژیانا خوه به‌رده‌وام بكه‌ن.
د داخۆیانیا رۆژنامه‌ڤانێن بێ سنۆر دا هه‌روه‌سا هاتیه راگه‌هاندن كو ده‌ستهه‌لاتێن ل وه‌لاتێن وه‌ك رۆسیا، كۆر‌یا باكور و ئیران د رێزا ئێكێ دانه كو مه‌ترسیێ بۆ سه‌ر ژیانا رۆژنامه‌ڤانان دروست دكه‌ن و هه‌تا ژ ده‌ستێ ڤان وه‌لاتان بهێت ناهێلن رۆژنامه‌ڤان كارێن خوه ب ئازادانه بجه بینن و به‌رده‌وام گه‌فان ل سه‌ر ژیانا رۆژنامه‌ڤانان دروست دكه‌ن، د ره‌وشا نها دا ب سه‌دان رۆژنامه‌ڤان ژ ئالیێ ڤان وه‌لاتان ڤه هاتینه ده‌سته‌سه‌ر كرن و د زیندانان دانه.
