ئیران پیلانەکا مەترسیدار ل دژی کوردان دگێریت
ئەڤرۆ نيوز:
ناڤەندا ھاریکاریا پارتێن رۆژھەلاتێ کوردستانێ دوھی د داخۆیانیەکێ دا راگەھاند کو رەوشا ناڤخوەیی یا ئیرانێ گەلەکێ خراب بوویە و رژێما ئیرانێ ژی وەکو سالێن بۆری دیسان دخوازیت ب ھندەک رێیان خوە ژ ڤێ قەیرانێ قورتال بکەت و ل گۆر پێزانینێن گەھشتینە مە پیلانەکا مەترسیدار ل دژی کوردان برێڤە دچیت و مخابن ھندەک ھێز ژی ڤێ زەمینێ بۆ ئیرانێ خوەش دکەن.
د بەردەوامیا داخۆیانیێ دا ئاماژە ب ڤێ یەکێ ژی ھاتیە کرن کو رژێما ئیرانێ دخوازیت جارەکا دی کوردان بکەتە قوربانیا پیلانێن خوە یێن مەترسیدار و ژ بەر ھندێ ژی ئەم داخواز ژ وەلاتیێن کورد ل رۆژھەلاتێ کوردستانێ و ھەموو ئالیێن سیاسی دکەین کو ل ھەمبەر پیلانێن مەترسیدار یێن ئیرانێ د ھشیار بن.
