ئیران: چ ژ دەستێ ترامپی دهێت بلا بکەت
مەسعود پزیکشیان سەرۆک کۆمارێ ئیرانێ راگەهاند کو ئەمریکا دڤێت ل ژێر ناڤێ دانوستاندنان و چارەسەریێ ئیرانێ نەچار بکەت دا دەست ژ هەموو داخوازیێن خوە بەردەت و یا ئەمریکا دڤێت بجه بینیت، لێ ئیران ب چو رەنگەکێ داخوازیێن ئەمریکا قەبوول ناکەت، ئیران دەست ژ مافێن خوە بەرنادەت و گۆت: (مە بەری نها ژی گەلەک جاران دیار کریە کو بەرنامێ ئەتۆمی یێ ئیرانێ جهێ مەترسیێ نینە، چونکی ئیران ب چو رەنگەکێ کار بۆ دروستکرنا چەکێ ئەتۆمی نەکریە و ناکەت ژی).
سەبارەت ب گەفێن ترامپی ژی سەرۆک کۆمارێ ئیرانێ دیار کر، ب زۆرداریێ و گەفان چو پرسەک چارەسەر نابیت، هەکە ئەمریکا بڤێت ب زۆرداریێ بگەهیتە ئارمانجێن خوە بلا یا ژ دەستێ ترامپی و ئیدارا وی دهێت بکەت، ئیران ل ژێر گڤاشتنان و گەفان بەرهەڤ نینە ل گەل ئەمریکا دانوستاندنان بکەت، دانوستاندنێن وەسا ژی بێگومان چو ئەنجامێن خوە نابن.
