ئیران ژ بهێزبوونـا ئازەربایجـانێ یا دلگـرانە
هژمارەک ژ ئەندامێن پەرلەمانێ ئیرانێ دا نامەکێ دا بۆ سەرۆک کۆمارێ وی وەلاتی دیار کرینە، تورکیا و ئازەربایجان یێ دەست ب یاریەکا مەترسیدار کرینە، تورکیا دڤێت ب رێیا ئازەربایجانێ پێگەهێ خوە ل ئیرانێ ژی بهێز بکەت، ب تایبەتی ژی روودانێن ڤێ دووماهیێ ل قەرەباغێ مەترسیەکا خوە یا مەزن بۆ ئیرانێ هەیە، چونکی تورکیا و ئازەربایجان دخوازن سێ پارێزگەهێن ئیرانێ ژی بکەنە پشکەک ژ ئاخا ئازەربایجانێ و دەمەکە ژ بۆ هندێ کار دکەن.
ئەو یەک د دەمەکێ دایە بەری نها ئێک ژ سەرکردێن ئیرانێ ژی ب رێیا نامەکێ بۆ سەرۆک کۆمارێ وی وەلاتی دیار کربوو، تورکیا دڤێت ب رێیا وەلاتێ ئازەربایجانێ سێ پارێزگەهێن (ئەردەبیل، تەبریز و ئورمیە) ژ ئیرانێ جودا بکەت و بکەتە پشکەک ژ ئاخا ئازەربایجانێ، چەندین سالن ژی ئەو ب رێیێن جودا جودا کار ل سەر بلندکرنا هەستێ نەتەوایەتیێ ل دەف ئازەریێن ئیرانێ دکەن.
هەژی ئاماژەپێدانێ یە، کو بەری چەند مەهان هێزێن سەربازی یێن ئیرانێ ل سەر سنۆرێ ئازەربایجانێ دەست ب مانۆرەکا مەزن یا سەربازی کرن و فەرماندارێن ئیرانێ ژی ل سەر سنۆرێ ئازەربایجانێ دیار کرن، هەر مەترسیەک ل سەر ئیرانێ دروست ببیت ئەو دێ ب هەموو شیانێن خوە ئاخا ئیرانێ پارێزن و چو وەلاتەک نەشێت مەترسیان بۆ ئیرانێ دروست بکەت.
چەند سالن بەرپرسێن ئیرانێ وەلاتێ ئازەربایجانێ ب ڤێ یەکێ تومەتبار دکەن کو هاریکاریا ئسرائیلێ دکەن و ب رێیا ئازەربایجانێ پیلان ل دژی ئیرانێ دهێنە گێران، هەتا بەری چەند مەهان ژی پەیوەندیێن ئیرانێ و ئازەربایجانێ گەلەک د خراب بوون.
چاڤدێرێن سیاسی ژی دیار دکەن، تورکیا دڤێت ب رێیا ئازەریێن ئیرانێ پێگەهێ خوە ل ئیرانێ ژی بهێز بکەت، چەند سالن ژی کار ل سەر هەستێ نەتەوەیی یێن ئازەریان ژی دهێتە کرن، چونکی هندەک ژ بەرپرسێن ئازەربایجانێ وەسا دبینن دڤێت ئازەریێن ل ئیرانێ ژی بگەهنە مافێن خوە و دەولەتا خوە ئاڤا بکەن، ئەو یەک ژی بوویە ئەگەرێ هندێ پەیوەندیێن ئیرانێ و ئازەربایجانێ د دەمێن بۆری دا گەلەک ئالۆز ببن.
