ئیران ژ هەلوەستێ ماکرۆنی دلگرانە
وەزیرێ دەرڤە یێ ئیرانێ راگەهاند کو هەلوەستێ سەرۆکێ فرەنسا کو بەری چەند رۆژان دیار کربوو ئیران مەترسیەکا گەلەک مەزنە بۆ فرەنسا و ئۆرۆپا د جهێ خوە دا نینە و ئەو یەک د خزمەتا بەرژەوەندیێن هەر دو ئالیان دا نینە و ئیران ب فەرمی نەرازیبوونا خوە ل هەمبەر هەلوەستێ فرەنسا دیار دکەت.
عەباس ئێراقچی ئەو یەک ژی دیار کر، بەرنامێ ئەتۆمی یێ ئیرانێ د چارچۆڤەیێ قانوونێن نێڤدەولەتی دایە و ئاشتیخوازانە یە و بەری نها ژی وان دیار کرینە کو بەرنامێ ئەتۆمی یێ ئیرانێ نابیتە مەترسی بۆ سەر چو وەلاتەکێ.
ئەو یەک د دەمەکێ دایە کو بەری سێ رۆژان ئیمانوێل ماکرۆن سەرۆکێ فرەنسا دیار کربوو ئیرانێ دڤێت ببیتە خوەدانا چەکێ ئەتۆمی و نها ئیران بوویە مەترسیەکا گەلەک مەزن بۆ فرەنسا و وەلاتێن ئێکەتیا ئۆرۆپا و دڤێت رێگری ل بەرنامێ ئەتۆمی یێ ئیرانێ بهێتە کرن.
