ئیران: کار بۆ ئاڤاکرنا هەڤپەیمانیەکا نوو دکەین
شەهرام ئیرانی فەرماندارێ هێزین دەریایی یێ ئیرانێ راگەهاند، ئەو وەکو ئیران ل گەل هندەک ژ وەلاتێن کەنداڤی دەست ب دانوستاندنان کرینە و دخوازن هەڤپەیمانیەکا نوو ئاڤا بکەن، چونکی وەلاتێن عەرەبی و ب تایبەتی ژی یێن کەنداڤی باش دزانن پێدڤیە پێکڤە کار بکەن، هەکە ئەو یەک نەهاتە کرن دێ گەلەک ئالۆزیێن نوو ژی روو دەن.
ناڤهاتی ئەو یەک ژی دیار کر، پاکستان و هندستان ژی دێ د ناڤ هەڤپەیمانیا نوو دا جهێ خوە گرن، چونکی ئەو یەک بۆ وان ژی گەلەک گرنگە، ب تایبەتی ژی وەلاتێ سعوودیێ دێ رۆلەکا بەرچاڤ هەبیت د ئاڤاکرنا هەڤپەیمانیا نوو دا.
شەهرام ئیرانی د پشکەکا دی یا ئاخڤتنا خوە دا ئەو یەک ژی دیار کر، هەتا نها وەلاتێن وەکو ئیراق، بەحرێن، سعوودیێ، قەتەر، پاکستان و هندستان د هەڤپەیمانیا نوو دا جه دگرن و وان دڤێت هەڤپەیمانیا خوە بەرفرەهتر ژی بکەن، چونکی ئەو یەک د بەرژەوەندیا هەموو وەلاتان دایە.
چاڤدێرێن سیاسی ژی دیار دکەن، ئیرانێ دڤێت پشتی سعوودیێ پەیوەندیێن خوە ل گەل وەلاتێن دی یێن عەرەبی ژی باش بکەت، ب تایبەتی ژی نها ئیران ب رێیا وەلاتێ عومان دانوستاندنان ل گەل مسرێ دکەت و دخوازیت پەیوەندیێن خوە ل گەل مسرێ ئاسایی بکەت، هەروەسا ئیران ب رێیا هندەک وەلاتێن ئێکەتیا ئۆرۆپا ل گەل ئەمریکا ژی دانوستاندنان دکەت، چونکی ئیرانێ دڤێت ستراتیژیا خوە ل رۆژهەلاتا ناڤین و جیهانێ بگوهۆڕیت.
