ئیران گەلەک لاواز بوویە و کورد دشێن بگەهنە مافێن خوە
بسپۆرێن کاروبارێ سیاسی دیار دکەن، ژ بەر ئێرشێن ئەمریکا و ئسرائیلێ نها ئیران لاواز بوویە و بەردەوامیا شەڕی دێ بیتە ئەگەرێ گوهۆڕینێن باش و هەکە کورد ل رۆژهەلات ئێکگرتی بن دێ گەهنە مافێن خوە و نابیت کورد خوە بکەنە قوربانی.
د. ئیقبال دوڕە بسپۆرێ کاروبارێن سیاسی دیار کر، دووماهی داخویانیا ترامپی نیشا ددەت کو سەرۆکێ ئەمریکا دڤێت رژێما ئیرانێ ژناڤ ببەت و د هەمان دەمی دا ئیرانێ ژی دڤێت هەتا دووماهیێ شەڕی بکەت، ئانکو د رەوشا نها دا دەلیڤەیا ئاشتیێ و رێککەفتنێ نەمایە و ژ بەر ڤێ یەکێ ژی دبیت شەڕێ نها د ناڤبەرا ئیرانێ ل گەل ئەمریکا و ئسرائیلێ دا دژوارتر ژی ببیت و ئەو یەک دێ بیتە ئەگەرێ لاوازبووونا زێدەتر یا ئیرانێ و گۆت: (راستە ئیران وەلاتەک بهێزە، لێ د وێ ئاستێ دا نینە کو بشێت بۆ چەند مەهێن دی شەڕی بکەت، چونکی ئەمریکا و ئسرائیل ب هەموو هێزا خوە ئێرشی ئیرانێ دکەن و ڤان دو رۆژێن بۆری دا مە دیت کا چاوا ئێرشێ ژێرخانا ئابووری یا ئیرانێ دهێتە کرن، ئانکو ئەمریکا و ئسرائیل کار بۆ ڤێ یەکێ دکەن دا ئیران خوە رادەست بکەت، هەتا وی دەمی دێ شەڕ ب دژواری بەردەوام بیت).
ناڤهاتی ئەو یەک ژی دیار کر، داخویانیا ڤێ دووماهیێ یا ترامپی ل دۆر کوردێن رۆژهەلاتێ کوردستانێ ژی نیشا ددەت کو کورد د بەرنامەیێ ئەمریکا دا هەنە، رەنگە نها هندەک زوو بیت دا کورد پشکداریێ د شەڕی دا بکەن، لێ هەر چاوا بیت د پاشەرۆژێ دا دێ رۆلێ کوردان ل ئیرانێ گەلەک گرنگ و کاریگەر بیت، هەر کەس دزانیت نها کورد ل ئیرانێ ئێکگرتی نە و هێزا وان ژی یا باشە و هەکە دەلیڤە هەبیت ئەو دشێن د دەمەکێ کورت دا دەڤەرێن خوە ژی ئازاد بکەن، بێگومان پێدڤیا ئەمریکا و ئسرائیلێ ب هێزا کوردان ل ئیرانێ هەیە و گۆت: (لێ جارێ زوویە کورد دەست ب شەڕی بکەن، چونکی د دەمەکێ وەسا دا دێ ئیران ب هەموو هێزا خوە ئێرشی رۆژهەلاتێ کوردستانێ کەت و دبیت هەرێما کوردستانێ ژی ببیتە مەیدانا شەڕی، ئەمریکی ژی باش دزانن هەکە تشتەک وەسا روو بدەت دێ زیانا خوە یا گەلەک مەزن بۆ بەرژەوەندیێن ئەمریکا ژی هەبیت و ژ بەر ڤێ یەکێ ژی ئەمریکا نەڤێت جارێ کورد پشکداریێ د شەڕی دا بکەن، لێ ئەو یەک رامانا هندێ نادەت ئەمریکا گرنگیێ ب کوردێن رۆژهەلاتێ کوردستانێ نادەت).
ل ئالیێ دی مەیسەم مورادی بسپۆرێ کاروبارێن سیاسی یێن ئیرانێ ژی دیار کر، نها ئەسمانێ ئیرانێ ب تەمامی کەفتیە دەستێ ئەمریکا و ئسرائیلێ و ئەو یەک ژی بێگومان وەسا دکەت ئەمریکا و ئسرائیلێ ئێرشی هەر جهەکێ ل ئیرانێ بکەن، د چەند رۆژێن بۆری دا ئێرشی پرانیا بنگەهێن سەربازی و پاسدارێن ئیرانێ ل رۆژهەلاتێ کوردستانێ هاتیە کرن، ئەو یەک ژی نیشا ددەت کو ئەمریکا و ئسرائیلێ بەرنامە بۆ کوردان هەنە، لێ د هەمان دەمی دا هێشتا ژی زوویە کورد پشکداریێ د شەڕی دا بکەن، چونکی ئیران هێشتا ژی ب تەمامی لاواز نەبوویە و مەترسیا رژێما نها ل سەر رۆژهەلاتێ کوردستانێ هەیە و هەکە نها کورد پشکداری شەڕی ببن دبیت ببنە قوربانی.
ناڤهاتی د پشکەکا دی یا ئاخڤتنا خوە دا ئاماژە ب ڤێ یەکێ ژی کر، دروستکرنا هەڤپەیمانیا سیاسی یا پارتێن رۆژهەلاتێ کوردستانێ گەلەک باش بوو، د دەمێ خوە دا بوو، لێ دڤێت هەڤپەیمانیا پارتێن سیاسی یێن رۆژهەلاتێ کوردستانێ خواندنەکا راست و دروست بۆ رەوشا نها بکەن، دڤێت کورد خوە بۆ گوهۆڕینێن مەزن ل ئیرانێ بەرهەڤ بکەن، سەردەمەک نوو دەستپێکریە و بێگومان دێ رۆلێ کوردان ژی گەلەک گرنگ بیت و گۆت: (هزرەکا مەزن بۆ کوردێن رۆژهەلاتێ کوردستانێ دهێتە کرن، جڤاکێ کوردی ل ئیرانێ ب سالانە خوە رێکخستن کریە و ئەمریکا و ئسرائیل ژی دخوازن رژێما ئیرانێ ژناڤ ببەن، هەر دەمێ ل تەهرانێ و دەڤەرێن دی ئالۆزی دروست بوون و نیشانێن کەفتنا رژێما نها دیار بوون وی دەمی هێزێن کوردی دشێن بچنە رۆژهەلاتێ کوردستانێ و دەڤەرێن کوردی ژی بێگومان دێ ب ساناهی هێنە ئازاد کرن، وی دەمی کورد دشێن ببنە خوەدان رۆلەک مەزن و کاریگەر بۆ پاشەرۆژا ئیرانێ).
