ئیسرائیليه‌ك سرۆدەکێ ب پێشمەرگەيی دبێژیت
ئەڤرۆ:
سترانبێژەکا ئیسرائیلی دیاردکەت سەرەرای وێ چەندێ کو ئەو زمانێ کوردی نوزانیت، لێ بزاڤا کری خوە فێرکەت و دبێژیت: ژبەرکو ئەز دبنیاتدا کوردم من ل بەرە سترانەکێ ب کوردی بێژم و دێ ئەو ستران ل دۆر قەھرەمانی و خوەراگریا پێشمەرگەی بیت.
سترانبێژ (حەداسە یشۆرۆن) کو نوکە ل وەلاتێ ناڤبری دژیت
بۆ ئەڤرۆ دیارکر بەری سالەکێ وێ بزاڤکرن خوە فێری زمانێ کوردی بکەت و نووکە مژوولی وێنەکرنا سرودەکێ یە، کو ناڤەرۆکا وێ ل دۆر قەھرەمانی وخوەراگریا پێشمەرگێ کوردستانێ یە د بەرۆکێن شەری دا دژی داعش و گەھشتیە قۆناغێن دووماھیێ و ل نێزیک دێ بەلاڤ بیت.
ل دۆر ھزرا چێکرنا ڤێ کلیپێ گۆت: ژبەر زیرەکی و چاڤ نەترسیا پێشمەرگەی کو ئەڤرۆ ئەز ل ئیسرائیل دبینم و من گوە لێ دبیت کو دەنگۆیێ زیرەکیا پێشمەرگەی ل ھەموو جیھانێ دەنگ ڤەدایە، من ھزرێن خوە کرن ئەز قەردارا پێشمەرگەی مە، لەورا من ڤیا وێ قەری ل سەر خوە راکەم، ئێدی من سرۆدەک بەرھەڤ کر و ئەز د کەمە دیاری بۆ وان پێشمەرگێن ل پێش ھەموو خەلکێ جیھانێ ڤە شەرێ داعش دکەن.
