ئیسرائیل: ئەم دێ ب ھەموو ھێزا خوە بەرەڤانیێ ل دەولەتا کوردی کەین
ئەڤرۆ نیوز:
وەزیرەکا حوکمەتا ئیسرائیلێ راگەھاند کو دەمێ ئاڤاکرنا دەولەتا کوردی یا ھاتی و دڤێت کوردان ژی وەکو ھەموو نەتەوێن دی دەولەتا خوە یا نەتەوی ھەبیت و ئەم ژی وەکو ئیسرائیل دێ ب ھەموو شیانێن خوە بەرەڤانیێ ل دەولەتا کوردی کەین.
ئایالید شاکید وەزیرا دادێ یا حوکمەتا ئیسرائیلێ د کۆنفرانسێ ئاسایشێ ل وەلاتێ خوە ئاخڤی و دیار کر کو دەم یێ ھاتی کورد ژی دەولەتا خوە یا نەتەوی ئاڤا بکەن، کورد ئێک ژ نەتەوێن ھەری مەزنن ل ڤێ جیھانێ کو ھەتا نھا ژی دەولەتا خوە ئاڤا نەکرینە، لێ نھا دەمێ ھندێ یێ ھاتی و دڤێت کوردان ژی وەکو ھەموو گەلێن دی دەولەتا خوە ھەبیت و ب رەنگەکێ ئازاد ل سەر ئاخا خوە بژین و گۆت: (کوردان ھەتا نھا ھێرشی چو خەلکەکێ نەکرینە و ھەموو گاڤان بەرەڤانی ل خوە کرینە، مە و کوردان گەلەک خالێن ھەڤپشک ل گەل ھەڤدو ھەنە و نھا ژی د گەلەک بیاڤان دا بەرژەوەندیێن مە دگەھنە ئێک و ژ بەر ھندێ ژی ھەکە کورد دەولەتا خوە راگەھینن ئەم وەکو ئیسرائیل دێ ب ھەموو شیانێن خوە بەرەڤانیێ ژ دەولەتا کوردی ل رۆژھەلاتا ناڤین کەین).
وەزیرا ئیسرائیلی کو بەری نھا ژی گەلەک جاران ب رەنگەکێ ئاشکرا پشتەڤانیا خوە بۆ دەولەتا کوردی دیار کریە ئەو یەک ژی دیار کر کو دەمێ دەولەتا کوردی ئاڤا ببیت دێ دوژمنێن ئیسرائیلێ ژی لاواز بن، ژ بەر ھندێ ژی نھا گەلەک ھێز ل رۆژھەلاتا ناڤین ناخوازن کو دەولەتا کوردی بھێتە ئاڤاکرن، لێ دڤێت ئەو یەک ژی باش بھێتە زانین کو ھەتا دەولەتا کوردی نەھێتە ئاڤاکرن و کورد ژی وەکو گەلێن دی یێن دەڤەرێ نەگەھنە مافێن خوە دێ ئاریشێن ل رۆژھەلاتا ناڤین ژی وەکو خوە بەردەوام بن، چونکو پرسا گەلێ کورد مەزنترین پرسا رۆژھەلاتا ناڤینە و دەمێ دەولەتا کوردی ھاتە ئاڤاکرن دێ ئەو پرسە ژی چارەسەر بیت و گۆت: (بەری نھا ژی من دیار کریە و دێ دیسان بێژم کو ئەز ب ھەموو رەنگەکێ پشتەڤانیێ ل دەولەتا کوردی دکەم و دەمێ یێ ھاتی کورد دەولەتا خوە راگەھینن و ئەز ھێڤیدارم کو ھێزێن کوردی د دەمەکێ نێزیک دا دەولەتا کوردی راگەھینن و زێدەتر گیرو نەبن).
وەزیرا دادێ یا ئیسرائیلێ د بەردەوامیا ئاخڤتنا خوە دا ئەو یەک ژی دیار کر کو بەری نھا سەرۆک وەزیر و گەلەک بەرپرسێن دی یێن ئیسرائیلێ ژی ب رەنگەکێ ئاشکرا دیار کرینە ئەو پشتەڤانیێ ل راگەھاندنا دەولەتا کوردی دکەن و ئەز ژی جارەکا دی ل سەر ناڤێ حوکمەتا ئیسرائیلێ پشتەڤانیا خوە بۆ دەولەتا کوردی دیار دکەم و ھەکە دەولەتا کوردی بھێتە راگەھاندن ئیسرائیل دێ ب ھەموو شیانێن خوە بەرەڤانیێ ژ کوردان کەت و وان تنێ ناھێلیت و گۆت: (دەولەتا کوردی چو مەترسیێن خوە بۆ وەلاتێن رۆژھەلاتا ناڤین نابیت، چونکو کورد ل سەر ئاخا خوە دژین و ب سالانە زۆرداری ل وان ھاتیە کرن و مافێ کوردان ھاتیە خوارن، ژ بەر ھندێ ژی ئەڤرۆکە مافەکێ سروشتی یێ گەلێ کوردە کو دەولەتا خوە راگەھینیت و ئەم ژی وەکو گەل و حوکمەتا ئیسرائیلێ دێ ب ھەموو شیانێن خوە پشتەڤانیێ ل دەولەتا کوردی کەین و ھەکە دەولەتا کوردی ھاتە راگەھاندن ئەز باوەرم دێ کورد ببنە ھەڤپەیمانێ ستراتیژی یێ ئیسرائیلێ و ئەو یەک بۆ ئاشتی و ئارامیا دەڤەرا رۆژھەلاتا ناڤین ژی یا گرنگە).
