(ئیسماعیل جومعه)ی نووترین سترانا خوه یا ب زاخۆ گۆتی كلیپ كر
ئه‌ڤرۆ، كاوین جیهاد:
هونه‌رمه‌ند ئیسماعیل جومعه نوكه مژوولی كلیپكرنا سترانه‌كا نوویه ب ناڤێ (زاخۆ ره‌وشا وه‌لاتێ من) كو ژ په‌یڤ و ئاوازێن وی ب خوه یه و ناڤهاتی دبێژیت: بۆ جارا ئێكێ یه سترانه‌كا فه‌رمی ب باژێرێ زاخۆ دروست دكه‌م، ژ به‌ر كو زاخۆ بناغه‌یێ سترانا كوردیه، و ڤیدیۆ كلیپ ژ ده‌رهێنانا ده‌رهێنه‌ر (كامیران بێتاسی) ڤه دهێته دروستكرن.
هونه‌رمه‌ند ئیسماعیل جومعه دبێژیت: زاخۆ بناغه‌یه بۆ سترانا كوردی ل سه‌ر ئاستێ هه‌ر چوار پارچێن كوردستانێ ژ به‌ر ڤێ چه‌ندێ من ژی وه‌كو ئه‌ركه‌ك و ب فه‌ر دیت كاره‌كی بۆ ڤی باژێری بكه‌م ستران ب ناڤێ (زاخۆ ره‌وشا وه‌لاتێ من)ه، ئه‌ڤه ئه‌ركه ل سه‌ر هه‌ر هونه‌رمه‌نده‌كی كار ل سه‌ر وێ چه‌ندێ بكه‌ت، ب ره‌وشه‌نبیری، هونه‌ری، مێرخاسی، مه‌رداتی، جامێرینی و جوانیا زاخۆ بێژیت.
ناڤهاتی دیار كر ژی كو په‌یڤ و ئاوازێن ڤێ سترانێ یێن وی ب خوه‌نه و ل ستۆدیویا (تون) ستۆدیو هاتیه ریكوردكرن، و كلیپا وێ ژ ئالیێ ده‌رهێنه‌ر، (كامیران بێتاسی) ڤه هاتیه دروستكرن، و كامیران ئێك ژ نمونه هونه‌رمه‌ند و ده‌رهێنه‌رێن كوردستانێ و ب تایبه‌ت باژێرێ زاخۆ یه.
دهێته زانین كو بۆ جارا ئێكێ یه سترانه‌كا تایبه‌ت ب باژێرێ زاخۆ ڤه دبێژیت، ئه‌رێ هزر و هه‌لبژارتنا ڤێ چه‌ندێ چه‌وا هات؟، ئیسماعیل جومعه دبێژیت: من گه‌له‌ك ژ مێژه هزر د ڤێ چه‌ندێ دا كربوو كو كاره‌كێ ژ هه‌ژی ل سه‌ر زاخۆ دروستبكه‌م و ئه‌و كار ژی ژ وان بیت كو ئه‌م هه‌موو شانازیێ پێ ب بكه‌ین و دیاره ئه‌و ده‌رفه‌ت ل ڤێ چه‌ندێ هات كو بشێم ئه‌و ئه‌ركێ ل سه‌ر من به‌رامبه‌ر زاخۆ وی ئه‌ركی ئه‌دا بكه‌م.
سه‌باره‌ت ساخله‌میا وی ناڤهاتی دبێژیت: ئه‌ز ده‌ستێ خوه دده‌مه سنگێ خوه بۆ گه‌لێ خۆ و قه‌ت وان ژبیر ناكه‌م، ژ به‌ر كو من خه‌مگینی و دلئشیا وان به‌رامبه‌ری خوه ددیت، و سوپاس بۆ خودێ نوكه ره‌وشا ساخله‌میا من گه‌له‌ك باشه.
ئه‌رێ ئیسماعیل مه‌ره‌م ژ پشكداریا هه‌ر سێ هونه‌رمه‌ندێن ناڤدار یێن باژێرێ زاخۆ، سه‌باح زاخۆیی، عه‌بدولعه‌زیز سلێمان و سه‌میر زاخۆیی چیه د ناڤ دیمه‌نێن كلیپێ دا؟ ناڤهاتی دبێژیت: پشكداریا هه‌ر سێ ماموستایێن ناڤدار بۆ من جهێ شانازیێ بوون كو ژ ئالیێ كلیپێ ڤه دگه‌ل من د پشكدار، و ئه‌و هه‌ر سێ ماموستایه بووینه سینبۆل بۆ كوردستانێ و باژێرێ زاخۆ ب تایبه‌ت، ژ به‌ر كو هه‌ر ده‌مێ توو هزر ل هونه‌رمه‌ندێن نه‌مر یێن مینا ئه‌یاز و ئه‌رده‌وانی دكه‌ی ل زاخۆ هه‌لبه‌ت ناڤێ ڤان هونه‌رمه‌ندێن ژ هه‌ژی ئێكسه‌ر ل ڤی باژێری دهێته بیرا مرۆڤی.
ده‌رهێنه‌ر كامیران بێتاسی، كو بۆ جارا ئێكێ یه وه‌كو ده‌رهێنه‌ر كار دگه‌ل هونه‌رمه‌ند ئیسماعیل جومعه‌ی دكه‌ت دبێژیت: ب راستی هه‌ر ژ مێژه ئه‌ز ئێك ژ حه‌ز ژێكه‌ره‌كێ هونه‌ر و كه‌سایه‌تیا هونه‌رمه‌ند (ئیسماعیل جومعه)ی مه، له‌وما كاركرن د ڤێ كلیپێ دا شیاینه كاره‌كێ ژ هه‌ژی پێكڤه بكه‌ین، و د دیمه‌نێن كلیپێ دا، چه‌وا هه‌ر تشته‌كێ زاخۆ بووته مه‌ره‌ق ببیت، وه‌سا ب ساناهی دێ د ڤێ كلیپێ دا ده‌ینه به‌ر چاڤێن خه‌لكی، ئه‌وا ب جوانی و ب په‌سنێن خوه ئیسماعیلی به‌حسێ زاخۆ كری ئه‌م ژی شیاینه چ ب وێنه چ ب ئه‌رشیف وێ چه‌ندێ نیشا خه‌لكێ خوه بده‌ین.
هونه‌رمه‌ند سه‌باح زاخۆیی ده‌رباره‌ی ئسماعیل جومعه‌ی و سترانا وی یا نوو ب زاخۆ دبێژیت: ئیسماعیل جومعه ئێك ژ ده‌رچویێن هونه‌ری یێن باژێرێ زاخۆیه و ژبه‌ر ڤێ چه‌ندێ ده‌نگ و هونه‌رێ وی نێزیكی هونه‌رمه‌ندێن ناڤدار یێن زاخۆیه و ده‌ست خوه‌شیێ ل وی دكه‌ین كو وی بریارا وێ چه‌ندێ دایی كو میكسه‌كێ د ناڤ به‌را هونه‌رمه‌ندێن دهۆك و زاخۆ دا بكه‌ت، و سه‌ركه‌فتن ئه‌وه ئه‌م هونه‌رمه‌ند ب دلخوه‌شی و پێكڤه ژیانێ د ناڤا هونه‌ری دا كار بكه‌ین.
هونه‌رمه‌ند سه‌میر زاخۆیی ژی ده‌رباره‌یی وێ چه‌ندێ دبێژیت: كو هونه‌ر ب خوه ئێكه و ده‌رباره‌یی وێ چه‌ندێ كو هونه‌رمه‌نده‌ك نه خه‌لكێ زاخۆ بیت و سترانا ب زاخۆ بێژیت ئه‌ڤه جهێ سه‌ربلندیێ یه، و ب راستی ژی ئیسماعیل جومعه ژ هونه‌رمه‌ندێن نومره ئێكه، و یا هه‌ری گرنگ ئه‌و ئاواز و رتما پێ هاتیه گۆتن ب راستی زاخۆیانه گۆتیه.
هه‌لبه‌ستڤان عه‌بدولعه‌زیز سلێمان ژ وان كه‌سایه كو دگه‌ل گه‌له‌ك هونه‌رمه‌ندان كار كریه و ده‌رباره‌یی ڤێ به‌رهه‌می چ دبێژیت: ئیسماعیل هه‌رده‌م خوه ب خه‌لكێ زاخۆ دبینیت و هه‌لبژراتنا وێ سترانێ ژی نێزیكێ وێ چه‌ندێ یه ئه‌وا خه‌لكێ زاخۆ حه‌ز ژێ دكه‌ن، و ئه‌ز ب ناڤێ خوه و ناڤێ خه‌لكێ زاخۆ سوپاسیا وی دكه‌م ده‌رباره‌یی ڤی به‌رهه‌می و خوه‌زیا من ئه‌وه جهـ و ئالیێن په‌یوه‌ندیدار به‌رپرسیاره‌تیه‌كا وه‌سا دابا ئیسماعیل جومعه‌ی، ژ به‌ركو ئه‌و باش و باش ئازارێن خه‌لكێ پارێزگه‌ها دهۆكێ ب گشتی دزانیت و ژ هه‌ژی هه‌ر كاره‌كی یه.
