ئیعتدال خوه ب كه‌سه‌كا مه‌غدۆر دبینیت
دهۆك، شاكر ئه‌تروشی:
سترانبێژا به‌رنیاس (ئیعتدال مه‌حمود) د دیداره‌كێ دا بۆ رۆژناما ئه‌ڤرۆ دیاركر كو ده‌مێ ل سالا 1989 وێ ده‌ست بگۆتنا سترانان كری بۆ وێ گه‌له‌كا ب زه‌حمه‌ت بوو، لێ شیا خوه راگریت و هه‌موو ئاسنه‌گان ده‌ربازكه‌ت و پشتی بۆرینا ساله‌كێ ئه‌لبۆما خوه یا ئێكێ تۆماركر و هه‌تا نوكه سێ ئه‌لبۆمێن سترانان ل گه‌ل چه‌ند كلیپان هه‌نه، هه‌روه‌سا وه‌ك ئه‌كته‌ر ژی پشكداری د چه‌ند شانۆگه‌ریان دا كریه، هه‌روه‌سا درامایه‌كێ ژی ل دهۆكێ.
ناڤهاتیێ گۆت: مه ل رۆژئاڤا گه‌له‌ك زه‌حمه‌ت ددیت هه‌تا كاره‌كێ هونه‌ری ئه‌نجام ددا، چنكو رێگری و ئاسته‌نگ د مشه بوون، لێ هه‌ر چاوا بیت مه خوه راگرت و ل دووف شیانێن خزمه‌تا هونه‌رێ كوردی كر، ب تایبه‌ت دوارێ سترانێ دا، هه‌روه‌سا وه‌ك ئه‌كته‌ر ژی ل گه‌ل هه‌ڤژینێ خوه (چه‌تۆی) پشكداری چه‌ند شانۆگه‌ریان بوویمه، بۆ زانین ده‌مێ ئه‌م ل سوریێ ژمه هاته خاستن كو بچینه وه‌لاتێ لوبنانێ و ل وێرێ سترانێن عه‌ره‌بی بێژین و دبیت گه‌له‌ك پاره ژی گه‌هشتبانه مه لێ ئه‌ز رازی نه‌بووم و من هه‌رده‌م دگۆت ئه‌ز كوردم و بتنێ دێ خزمه‌تا هونه‌رێ كوردی كه‌م.
زێده‌تر گۆت: پشتی ره‌وشا ئێمناهیێ ل رۆژئاڤایێ كوردستانێ تێكچووی نه‌چار بووین مال و مۆلكێ خوه بجه بهێلین و ئاواره ببین و ل ده‌ستپێكێ ئه‌م دشیان بچینه ئۆرۆپا لێ ئه‌م نه‌چووین و مه گۆت دێ چینه هه‌رێما كوردستانێ و ل گه‌ل برایێن خوه یێن كوردی ژین و مه وه‌سا هزردكر كو ماده‌م ئه‌ز و هه‌ڤژینێ خوه هونه‌رمه‌ندین دێ رێزێ ل مه گرن و خانیه‌كی بۆمه گرن، لێ مخابن كرێدارین و هه‌تا چو مۆچێن رێزلێنانێ ژی بۆمه چێ نه‌كرینه.
ل دووماهیێ گۆت: كلتۆرێ مه كوردان یێ وه‌سایه هه‌رده‌م ئه‌م رێزێن ل بیانیان دگرین و یێن خوه ژبیردكه‌ین، ئانكو مه‌ره‌ما من ئه‌وه چه‌ند سترانبێژن عه‌ره‌ب و بیانی هاتینه كوردستانێ و رێزه‌كا گه‌له‌ك مه‌زن لێ هاتیه گرتن، لێ ئه‌م كوردین و كه‌سێ ئاگه‌ه ژ مه نینه، له‌ورا خوه ب كه‌سه‌كا مه‌غدۆر دبینم، بۆ زانین من چه‌ند ستران ل به‌ر ده‌ست هه‌نه، لێ ژبه‌ركو چو هاریكاری نینن نه‌شێم تۆمار بكه‌م.
