ئیمان
د. ئەمجەد عوبەید گەڤەركی
وێ رۆژێ ژی وەكی هەر رۆژ ل سەر وی شوستەی د چوو و دهات، لێ ڤێجارێ د گەل خۆ د ئاخڤت، لەورا خودانێ خوارنگەها لەفا، هەست ب بێزارییا وی كر، و ماف دا خۆ كو دگەل ب ئاخڤیت..
وەرە روینە خوار لەفەكێ بخۆ و چایەكا خۆش ژی ب سەرداكە.. ئەوی ژی باوەر نەكر وبێی دو دلی، پێشنیارا وی قەبویلكر.
– چەند رۆژەكە تە مشە ل ڤارا دبینم، تە ئاریشەیەك هەیە؟
– ئەز باوەر ناكەم ئاریشەیا من ب تە چارەسەر ب بیت.
– نەسەحكە كەلەخێ من، مێری ژی بارێن ژ خۆ مەزنتر هەلدگرن.
– پشتی لێبۆرێن لێ خواستی: ئەڤە پتر ژ هەیڤەكێ یە ئەز سەرەدانا ڤێ رێڤەبەرییا ب رەخ تەڤە دكەم، هندی د هێمی نوزانم بو كارێ من ب رێڤە ناچیت؟
– ب كەنیڤە و پشتی چایەكا دیژی بو ژ چایخانا ل تەنشت خوارنگەها خۆ داخازكری و جگارەكا زراڤ ژی بو پێشكێشكری، گۆتێ: شولا تە گەلەكا ب ساناهیە.
ویژی ب كەنیەكا پویتی ڤە گۆت: تو تڕانێن خۆ ب من دكەی؟
– ئەز تڕانا ب كەسێ ناكەم و ب تە ژی ناكەم، جگارا خۆ ب كێشە و هەرە ژۆرا ژمارە پێنج، ژنەكا لوێرێ ناڤێ وێ ئیمانە، پێنجی هزاران بكە د لەپێن وێ دا و تە شولەژێ نەبیت.
بەرەف وێ ژۆرێ چووو و دو لەفێن گەسا گوشتی ژی دگەل خۆ برن، و دگۆتە خۆ شەرمە دەست ڤالا بچم، ئەسەح نوكە خاتینێ تێشت نە خواریە، مانێ فەرمانبەرێن نوكە تێشتا ل مال ناخون.
ئیمانێ هەر زوی پێنجی هزار حەشاندە د چانتا خۆ دا، لێ لەفە نە راكرن.
– ببۆرە چێدبیت تێشتا یا ژ هەژی تە نە بیت، لێ بتنێ خوارنگەها لەفا یا نێزیكی وەیە.
– نەخێر نە ژ بەرهندێ.. بەلكو ئەڤرۆ دوشەمبە، و ئەز هەمی دوشەمب و پێنج شەمبا یا ب رۆژیمە!!
