ئیمزایه‌ك ژ چاڤێن ته
ڤیان محه‌مه‌د تاهر
ئه‌ز ل ژڤانێ ئیمزایه‌كا شین
بووم
ل سه‌ر لاپه‌ڕێ ژیانێ
دێمێ دادیێ
ب دیمه‌نێ خوه‌زایی
بنه‌خشینیت و
ئه‌ز ببمه پێلستانكه‌كا ئاشق
د ناڤ دا بهه‌لپه‌ڕم..
ب ره‌نگێ په‌ڕێن خوه
لێڤێن وژدانێ سۆر بكه‌م
ب تلێن یاسایه‌كا قه‌ده‌غه
ل سه‌ر بنڤیسم
حه‌ز دكه‌م نێرگزه‌كا سروشت
هۆڤ بم
هه‌ر تشتی ل ده‌ردۆرا خوه
ژ وه‌راركرنێ براوه‌ستینم و
د ناڤ خوناڤا خوه دا غه‌واره كه‌م
ته‌ڤ گیاندارا
د ره‌نگێ زه‌ر وه‌ر دا كه‌م
زه‌ری بكه‌مه ره‌نگێ ماچێن عه‌سه‌لی
زه‌ری بكه‌مه ده‌نگێ ئه‌ڤینێن ئه‌زه‌لی
ب زه‌ری سۆری فڕكه‌م
هناڤێن خوه ژ جوانیێ پڕ بكه‌م
ڕه‌نگێ عه‌شقێ و خوینێ
ژ ئێك ڤاڤێر بكه‌م
خوینێ زه‌ر بكه‌م
عه‌شقێ سۆر بكه‌م
ل سه‌ر بنڤیسم
حه‌ز دكه‌م
دار زه‌یتوونه‌كا هه‌رده‌می بم
ده‌مارێن من ئاخێ كه‌سك بكه‌ن
زكێ وه‌رزێ ره‌ونه‌ق كوژ
شه‌ق بكه‌م
كاتێن من تێدا ئاڤز ببن و
پاییزێن كه‌سك ژێ ببن.
