ئینانا مریشكان ژ ده‌رڤه هاته قه‌ده‌غه‌كرن
هه‌ولێر، قائید میرۆ:
هه‌ردو حوكمه‌تێن هه‌رێم و فیدڕال ئینانا به‌رهه‌مێ مریشكان ژ ده‌رڤه قه‌ده‌غه كر و به‌رپرسه‌كێ وه‌زاره‌تا چاندنا حوكمه‌تا هه‌رێما كوردستانێ ژی ئاشكرا كر، ل هه‌رێما كوردستانێ هزار و 700 پڕۆژه‌یێن به‌رهه‌مئینانا مریشكان هه‌نه.
حسێن حه‌مه كه‌ریم، په‌یڤدارێ وه‌زاره‌تا چاندنێ بۆ رۆژناما ئه‌ڤرۆ دیار كر، ل هه‌رێما كوردستانێ هزار و 700 پڕۆژه‌یێن خودانكرنا مریشكان هه‌نه و نێزیكه بۆ دابینكرنا پێدڤیێن بازاڕێ ناڤخوه و گۆت: “ژ به‌ر ڤێ چه‌ندێ و ب مه‌ره‌ما گرنگیدان ب به‌رهه‌مێ ناڤخوه، وه‌زاره‌تا چاندنا حوكمه‌تا هه‌رێما كوردستانێ ئینانا مریشكان ژ ده‌رڤه قه‌ده‌غه‌كریه، ئه‌و ژی بۆ گرنگیدان ب به‌رهه‌مێ ناڤخوه و پشته‌ڤانیا جۆتیارێن هه‌رێما كوردستانێ، چونكو هه‌ر به‌رهه‌مه‌كێ ناڤخوه هه‌بیت و به‌هرا بازاڕی بكه‌ت ئینانا وی ژ ده‌رڤه دهێته راگرتن”.
حسێن حه‌مه كه‌ریم گۆتژی: “وه‌زاره‌تا حوكمه‌تا فیدرال ژی بڕیارا قه‌ده‌غه‌یا ئینانا مریشكان ده‌ركریه، به‌لێ هێشتا دیار نینه دێ رێكێ ده‌نه به‌رهه‌مێ هه‌رێما كوردستانێ بچیته پارێزگه‌هێن ناڤه‌ڕاست و باشوورێ ئیراقێ، بڕیاره ل دۆر ئه‌ڤی بابه‌تی كۆمبوونه‌ك د ناڤبه‌را هه‌ردو وه‌زاره‌تێن حوكمه‌تا هه‌رێما كوردستانێ و به‌غدا دا بهێته كرن و دێ هه‌ماهه‌نگی ل دۆر ده‌ركرنا هه‌ر بڕیاره‌كێ هێته كرن”.
