ئینانا مریشکان ژ تورکیا جارەکا دی دێ دەست پێ کەت
ئەڤرۆ:
پشتی دەربازبوونا نێزیکی دو ھەیڤان ب سەر قەدەغەکرنا ئینانا مریشک و بالندان ژ تورکیا بۆ ھەرێما کوردستانێ، وەزارەتا چاندن و ژێدەرێن ئاڤێ بریار دا جارەکا دی ئینانا وان دەست پێ بکەت.
وەزیرێ چاندن و ژێدەرێن ئاڤێ ل حوکمەتا ھەرێما کوردستانێ عەبدولستار مەجید د کۆنگرەکێ رۆژنامەڤانی دا دیارکر کو ئینانا مریشک و بالندان ژ تورکیا بۆ ھەرێما کوردستانێ ھاتبوو قەدەغەکرن چونکو ل دووڤ قانوونا رێکخراوا ساخلەمیا جیھانی ل ھەر وەلاتەکێ نەخۆشیا ئەنفلوەنزا بالندان بەلاڤ ببیت دڤێت بەرھەمێ پەلەوەری یێ وی وەلاتی بھێتە راوەستاندن، لەورا ل دووڤ وان رێنمایان ھاتە قەدەغە کرن.
عەبدولستار مەجید ل دۆر دەستپێکرنا ئینانا بەرھەمێن پەلەوەری یێن وی وەلاتی گۆت تورکیا نامەک بۆ رێکخراوا ساخلەمیا ئاژەلان یا جیھانی و ھەرێمێ ژی ھنارتیە کو گرفتا بەلاڤبوونا ئەنفلوەنزا بالندان کونترۆل کریە و چو مەترسیا وێ ئێشێ ل سەر وی وەلاتی نەمایە، لەورا بریارا قەدەغەکرنا ئینانا بالندان ھاتە ھەلوەشاندن و بریار ھاتە دان ژ ١-٧ بەرھەمێ پەلەوەران ژ وی وەلاتی بھێتە ھەرێما کوردستانێ.
ئەو ژی ئاشکرا کر کو ژ ١٩-٦-٢٠١٥ ئەنفلوەنزا بالندان ل ئیرانێ ھاتیە راگەھاندن لەورا نوکە ئینانا مریشکان ژ وی وەلاتی ھاتیە قەدەغە کرن.