ئینانا مریشکێن رۆسی بۆ ھەرێمێ ھاتە قەدەغەکرن
ئەڤرۆ نيوز:
حوکمەتا عیراقێ، رێڤەبەریا دەرگەھێ سنووری یێ ئیبراھیم خەلیل ئاگەھدار دکەت کو ئێدی ب چو رەنگان نابیت رێ ب مریشکێن رۆسی بھێتە دان کو بھێنە د ناڤ ھەرێما کوردستانێ دا.
عەبدولرەزاق ئێمینکی، بەرپرسێ پشکا پەلەوەران ل رێڤەبەریا ڤێتێرنەریا دھۆکێ، بۆ ئەڤرۆ دیار کر، رێکخراوا ساخلەمیا جیھانی (OIE) حەفتیانە لیستەکێ بەلاڤ دکەت و تێدا ئاشکرا دکەت کا ل کیژ وەلاتێ جیھانێ ئەنفلاوەنزا پەلەوەران ھەیە و دیار دکەت کو نابیت مریشکێن وان بچنە ھیچ وەلاتەکی.
ئێمینکی ئاشکرا ژی کر کو ئەڤە پتر ژ شەش ھەیڤانە ل وەلاتێ رۆسیا ئەنفلاوەنزا پەلەوەران ھەیە و چەند حالەت ژی پەیدابووینە، ھەتا نوکە وان راپۆرتا خوە یا دووماھیێ نە راگەھاندیە، ژ بەر ھندێ ژی چوونا مریشکێن رۆسی بۆ وەلاتێن دی قەدەغەیە و ب تنێ وان مافێ ھەی مریشکێن خوە ل ناڤخوە بفرۆشن، ھاتنا وان بۆ ھەرێما کوردستانێ ژی قەدەغەیە، ھەتا کو ئەنفلاوەنزا پەلەوەران ل وەلاتێ رۆسیا نەمینیت.
ژێدەرەکی ژ رێڤەبەریا دەرگەھێ سنووری یێ ئیبراھیم خەلیل، بۆ ئەڤرۆ دیار کر، وەزارەتا چاندنا عیراقێ ب فەرمی ئەو ئاگەھدارکرینە کو ژ بەر ھەبوونا ئەنفلاوەنزا پەلەوەران، ب چو رەنگان نابیت مریشکێن رۆسی یێن ساخ و یێن بەستی ژی ژ دەرگەھێ ئیبراھیم خەلیل بھێنە د ناڤ ھەرێما کوردستانێ دا، چونکو مەترسی ل سەر بەلاڤبوونا ئەنفلاوەنزا پەلەوەران ھەیە و نابیت مریشکێن وان بھێنە ھەرێمێ.
