ئینیۆ مۆریکۆنی ئەو کەسێ ب مۆزیکێ وێنە دکێشان
بینەر محەمەد
ئەرێ تو دشێی تەماشەی فیلمەکێ بکەی بێی مۆزیک؟ بێگومان نە. مۆزیک نیڤا چیڕۆکێ یە د مێژوویێ دا، کەس وەک «ئینیۆ مۆریکۆنی» نەشیا مۆزیکێ بکەتە زمانەکێ کو هەمی مۆچیژکێن لەشی بلەرزینیت. ئەو مۆزیكژەنێ ئیتالی یێ کو پتر ژ (400) پارچە مۆزیک بۆ فیلم و درامایان داناین، شێوازێ تەماشەکرنا مە بۆ سینەمایێ گوهۆڕی.
١- مۆزیکا «سترکا» و دەریایێ:
مۆریکۆنی تەنێ ئامیرێن مۆزیکێ یێن ئاسایی بکار نەدئینان. د فلمێن «کابۆی» دا (وەک فیلمێ: (باش، خراب و کرێت). وی دەنگێ «فیتکان»، «قێژییان و بالندەیان»، «دەنگێ قامچیان» و تەنانەت «دەنگێ دەبانجەیێ» کرە پارچەیەک ژ مۆزیکێ. ئەڤە داهێنانەکا سەیر بوو کو پێشتر کەسێ نەکربوو.
٢- مۆزیک وەک ئەکتەرەکێ سەرەکی:
ل دەڤ مۆریکۆنی، مۆزیک تەنێ بۆ پڕکرنا ڤالهیێ نەبوو. گەلەک جاران مۆزیکا وی پەیامەک دگەهاند کو ئەکتەری نەدشیا ب ئاخفتن بێژیت. مۆزیکا وی دشیا ترسێ، ڤیانێ، یان غەریبیێ ب گەهینیتە دلێ بینەری بێی کو چ پەیڤ بهێنە گۆتن.
٣- ژ ئیتالیا بۆ هۆلیۆدێ:
هەر چەندە وی مۆزیک بۆ فلمێن ئیتالی یێن کلاسیک دادنا، لێ ناڤودەنگیا وی گەهشتە هەمی جیهانێ. هەمی دەرھێنەرێن مەزن یێن هۆلیۆدێ خەون ددیتن کو ڕۆژەکێ مۆریکۆنی مۆزیکێ بۆ فلمێن وان دانیت. وی د ژیێ خۆ یێ درێژ دا، چەندین خەلاتێن ئۆسکارێ و جیهانی ب دەست ڤە ئینان.
٤- نهێنیا سەرکەفتنا وی:
مۆریکۆنی دگۆت: «مۆزیکێ پێدڤی ب هەناسەیێ هەیە.» ئەو خودان دیسپلینەکا مەزن بوو؛ سپێدێ زوو ژ خەو ڕادبوو و وەک ئەندازیارەکێ شەهرەزا مۆزیک دنڤیسی. وی باوەری هەبوو کو مۆزیک نابیت تەنێ شوینا دەنگی بگریت، بەلکو دڤێت «ڕوحا» فیلمی بیت.
ب کورتی:
ئینێۆ مۆریکۆنی ل سالا 2020ێ ژ جیهانێ بار کر، لێ مۆزیکا وی تا ئەڤرۆ د ناڤ جادە، مال، و سینەمایا جیهانی دا یا زێندیە. ئەم وەسا فێرکرن کو جارنا «دەنگ» ژ «وێنەی» ب هێزترە. ئەگەر فلمەک تابلۆ بیت، بێگومان مۆزیکا مۆریکۆنی ئەو ڕەنگە یێ کو ژیانێ ددەتە وێ تابلۆیێ.
