ئێخسیرێ دلشاد
قەهرەمان عەبدوللا بەرواری
دلێ من،
یێ د ناڤ خۆ دا سار دبیت
وەکو بەفرەکا بێ سیما
ل گەل باکوزیرکێ شەپرزە دبیت
جوانیەکا تەعل.. تەعلە
خۆ فێردکەت شرینبوونێ
دێ وەرە.. دێ..
دا ئەز و تۆ
دلێن برسی
پڕی پرسێن قورمزی بکەین
بەرچێلکێن مە،
دپڕن ژ خەمێن خوەشاڤی
دا خشیمییا هەست و سۆزا هەڤسار بکەین.
و بۆ دەمەکێ سەرمەدی
ئەز و تو
خۆ د کەلا عەشق و ئەڤینێ دا زیندان بکەین
دا کو ببینی ئێخسیر بووم ئەز
دەمێ بێ عەشق.
و نها ژی
ئێخسیرەکێ دلشادم،
دەمێ زیندانیەکێ عاشق.
