ئێدی بەسە، مالا خوە پیس نەكەن
بەری چەند ڕۆژان ئەز بۆ گەڕیانەكا كورت چوومە دۆرێن باژاڕێ دهۆكێ، ب ڕاستی ژی مرۆڤ شەرم ژ خوە دكەت دەما ژینگەها خوە ب ڤی ڕەنگی دبینیت، جهەك نینە مرۆڤ لێ روونیتە خوارێ ژ بەر پیساتی و بەرماییكێن سەیرانیان، مرۆڤ بۆ وژدانا خوە ببێژیت، دەزگەهێن ڕاگەهاندنێ و ژینگەهپارێزێن مە چو ل سەر ملێن خوە نەهێلانە، لێ ئەم جڤاكەكێ حێبەتینە، مرۆڤ وەسا هزر دكەت كۆ پڕانییا خەلكێ مە مێهڤانێن نەزانن ل سەر ڤێ ئاخێ، چونكی ب ڕاستی ژی مێهڤانێن زانا و ب وژدان ئەڤێ ب سەرێ ژینگەها مە نائینن، بەڕمیل و جهێن كۆ بۆ گلێشی و بەرماییكان هاتینە دانان د مشەنە، لێ پڕانییا خەلكێ مە گلێشێ خوە دهاڤێژیتە بەرپێن خوە مەژییێ وی هند كار ناكەت كۆ جهێ گلیشی نە ل بەرپێن وییە و وەساهزر ناكەت كۆ ڕۆژا پاشتر هەر ئەو ب خوە، یان ژی برایێ وی و خەلكێ وی دێ ل وی جهی روونن، باوەر بكەن هەر جارەكا ئەم بجینە سەیرانەكێ، ئەم بەرماییكێن خوە هەموویان كۆم دكەین و دگەل خوە د ئینینە مال، یان ژی د دانینە نێزیكترین جهێ كۆ بۆ بەرماییكان هاتییە دانان.
هەر چەندە كێماسی ل نك باژێڕڤانییا مە ژی هەنە، چونكی پێدڤییە هەمی ئێڤارییان، یان ژی هەفتییێ دو سێ جاران ترۆمێلێن باژێڕڤانیێ، بەرماییكێن سەیرانیان ئەوێن كۆمكرین و كرینە د كیسكێن نایلۆنیدا ل سەر جاددەیان و جهێن سەیرانیان ڕاكەن، لێ مخابن ڕۆژا پاشتر ڕووڤی و سەیێن بەرەللا وی گلێشی هەمیێ ل سەر جاددەیان و جهێن سەیرانییان بژالە دكەن.. پیسكرنا ژینگەهێ یا بوویە دیاردەیەكا بەرچاڤ و ب ترس نە بتنێ ژ دەرڤەی باژێڕان، بەلكی د ناڤا باژێڕان ب خۆژی دا، چونكی دەما مرۆڤ ل جاددە و كۆلانێن ناڤ باژێڕی ژی دهێت و دچیت ل پێش چاڤێن جڤاكی و بێی كۆ شەرم ژی بكەت و جهێ گلێشی دو پێنگاڤان ژ وی دوور نینە، لێ دێ گلێشێ خوە، یان قۆدیكا كۆلایێ هاڤێتە بەر پێن خوە، هەر وەكی ئەڤ جاددەیە نە وەلاتێ وییە، نە ئاخا وییە، نە ژی ژینگەها وییە. بریتانی دبێژن: ئەوێ ترومێلا وی یا پیس بیت مالا وی ژی یا پیسە، ئەم ژی دبێژین ئەو كەسێ ژینگەها خوە پیس دكەت باوەر بكەن هەر وەكی مالا خوە پیس كری، ژنگەها هەوە مالا هەوە یە ئێدی بەسە مالا خوە پیس نەكەن.
