ئێدی پێدڤیا روسیا وەکو جاران ب تورکیا نەمایە
ئەڤرۆ نیوز، هۆشەنگ تاجر:
ئەحمەد عیسا چاڤدێرێ سیاسی یێ رۆژئاڤایێ کوردستانێ راگەهاند کو رژێما سووریێ شیایە پرانیا دەڤەرێن ل ژێر کۆنترۆلا هێزێن ئۆپۆزسیۆنێ ژ دەستێ وان دەرخینیت و پەیەدە ژی هەر رۆژ هێڤیان ژ شامێ دکەت دا دانوستاندنان بکەن و بەرهەڤە هەموو دەڤەرێن رۆژئاڤا ب هندەک مەرجێن بچووک رادەستی وان بکەت و گۆت: (ژبەر هندێ ژی تشتێ نها دیارە رژێما بەشاری رۆژ ب رۆژێ یا بهێز دکەڤیت و روسیا ژی ڤێ راستیێ باش دبینیت و ژ بەر هندێ ژی نها وەکو جاران پێدڤیا روسیا د بابەتێ سووریێ دا ب تورکیا نەمایە).
ناڤهاتی ئەو یەک ژی دیار کر کو بەری نها گەلەک وەلاتێن جیهانێ داخوازا دوورخستنا بەشاری ژ دەستهەلاتێ دکرن و ئێدی ئەو یەک نەمایە و پرانیا وەلاتێن عەرەبی داخواز ژ سووریێ دکەن جارەکا دی ببیتە ئەنداما کۆمکارا عەرەبی، ئانکۆ پێگەهێ بەشاری بهێز بوویە و روسیا ژی وەکو جاران گرنگیێ ب تورکیا نادەت.
