ئێدی چو فه‌رمانبه‌ر ب گرێبه‌ست ناهێنه دامه‌زراندن
ئه‌ڤرۆ، ئه‌میر ئه‌ترووشی:
ل گۆره‌ی بریاره‌كا وه‌زاره‌تا دارایی یا حكوومه‌تا هه‌رێما كوردستانێ كو ل 29/4/2013 ده‌رچوویه و پشتی هینگی بۆ گشت وه‌زاره‌تا و رێڤه‌به‌ری و فه‌رمانگه‌هان هاتیه ره‌وانه‌كرن، ئێدێ دامه‌زراندنا فه‌رمانبه‌ران ل رێڤه‌به‌ریێن میری ب شێوه‌یێ گرێبه‌ست هاته راگرتن و ئه‌ندامه‌كا په‌رله‌مانێ كوردستانێ ژی ڤێ بریارێ ب زیان ڤه‌دگه‌رینیت.
ل دووڤ وێ نڤیسكارێ كو دانه‌یه‌ك ژێ ب ده‌ست رۆژناما ئه‌ڤرۆ كه‌فتیه، هه‌موو رێڤه‌به‌ری هاتینه ئاگه‌هداركرن كو ئێدی ب چو ره‌نگان داخوازا دامه‌زراندنا فه‌رمانبه‌ران وه‌كو گرێبه‌ست نه‌هێته كرن و خوه ئه‌گه‌ر پێدڤی ژی پێ هه‌بیت و تێدا هاتیه ژی (ژ به‌ركو ب تنێ ل وه‌زاره‌تا باژێرڤانی و گه‌شت و گوزارا هه‌رێمێ نها دۆرێن 14 هزار فه‌رمانبه‌رێن گرێبه‌ست هه‌نه و ئه‌ڤه ژی بارگرانیه‌كا مه‌زنه ل سه‌ر حكوومه‌تێ).
دلێر تارق، گۆته‌بێژێ وه‌زاره‌تا دارایی راگه‌هاند، رۆژانه وه‌زاره‌تێن حكوومه‌تا هه‌رێمێ هژماره‌كا مه‌زن یا نڤیسكاران پێشكێشی وه‌زاره‌تا دارایی دكه‌ن بۆ وێ یه‌كێ هنده‌ك فه‌رمانبه‌ران وه‌كو گرێبه‌ست ب دامه‌زرینن، له‌وما وه‌زیرێ دارایی د. پایز تاله‌بانی ئه‌ڤ بریاره ده‌ركر و بۆ گشت وه‌زاره‌تان هاته هنارتن كو ئێدی خوه ئه‌ڤ داخوازیه ژی ژ وه‌زاره‌تا دارایی نه‌هێته كرن.
ناڤبری دیار كر كو حكوومه‌تا هه‌رێمێ بریار دایه ئه‌ڤ ساله 15 هزار فه‌رمانبه‌ران ب فه‌رمی بدامه‌زرینیت، بۆ وێ یه‌كێ جهێن ڤالا پێ بهێنه پڕكرن و گرێبه‌ست نه‌مینن و ئه‌و بارگرانیه ل سه‌ر حكوومه‌تێ رابیت و گۆت: هه‌تا بودجه نه‌هێته په‌سه‌ندكرن، فۆرمێن دامه‌زراندنێ ناهێنه دابه‌شكرن.
هه‌ر د نڤیسكارێ دا هاتیه كو مۆچه‌یێ فه‌رمانبه‌رێن گرێبه‌ست د ناڤبه‌را 200 هه‌تا 800 هزاراند چیت و ل هنده‌ك وه‌زاره‌تان ب تنێ پاره خوارنه و چو جهێن ڤالا پرنه‌كرینه و ل گه‌ل هندێ ژی چ ئمتیازاتێن فه‌رمانبه‌ران وه‌كو ده‌رماله و خانه‌نشینی بۆ وان ناهێته هژمارتن.
به‌یان ئه‌حمه‌د ئه‌نداما په‌رله‌مانێ كوردستانێ ل دور ڤێ یه‌كێ دیار كر، بریارا وه‌زیرێ دارایی كو فه‌رمانبه‌ر ئێدی ب گرێبه‌ست نه‌هێنه دامه‌زراندن یا دروست نینه، چونكو نابیت هه‌موو ده‌رگه‌ه ل وه‌لاتیان بهێنه گرتن و ل گه‌له‌ك رێڤه‌به‌ریان پێدڤی ب شیانێن هنده‌ك فه‌رمانبه‌ران هه‌یه و رێ نینه خوه بدامه‌زرینن و هه‌كه ئه‌ڤ گرێبه‌سته نه‌بن دێ گه‌له‌ك ڤالاتی د ده‌زگه‌هێن میری دا په‌یدا بیت و گۆت: په‌رله‌مانێ كوردستانێ بریار ل سه‌ر وێ یه‌كێ دایه كو ئه‌و 15 هزار فه‌رمانبه‌رێن ئه‌ڤساله بهێنه دامه‌زراندن، پتریا وان ئه‌و بن یێن نها گرێبه‌ست ل رێڤه‌به‌ریێن میری ده‌وامێ دكه‌ن و بهێنه دامه‌زراندن.
