ئێرشـێن تورکیا بۆ سـه‌ر رۆژئاڤـایێ کـوردستانێ دژوارتر دبن
ب، سه‌رجان مەحمود:
ئێرشێن تورکیا ل سەر رۆژئاڤایێ کوردستانێ دژوارتر بووینە و چاڤدێرێن سیاسی ژی دیار دکەن، تورکیا دڤێت ئالۆزیان ل رۆژئاڤایێ کوردستانێ دروست بکەت، ب تایبەتی ژی تورکیا نها دڤێت خەلکێ دەڤەرێن سنۆری گۆندێن خوە چۆل بکەن دا پاشی تورکیا پەنابەرێن سووریێ ل وان دەڤەران بجه بکەت، ئانکۆ تورکیا گاڤ ب گاڤ کار بۆ گوهۆڕینا دیمۆگرافیا رۆژئاڤایێ کوردستانێ دکەت.
پشتی ده‌ست ب کاربوونا کابینا نوو یا حوکمەتا تورکیا، ئۆپه‌راسیۆن و ئێرشێن ده‌وله‌تا تورکیا بۆ سه‌ر رۆژئاڤایێ کوردستانێ دژوارتر بووینه و د ناڤ چار رۆژێن ده‌ربازبوویی دا، ده‌وله‌تا تورکیا نێزکی چل ئێرشێن ئه‌سمانی کرینە سه‌ر رۆژئاڤایێ کوردستانێ و د ئه‌نجاما ڤان ئێرشان دا سێ شه‌رڤانێن کورد جانێ خوه ژ ده‌ست داینه و سێ شه‌رڤان ژی بریندار بووینه، هەروەسا هاتە زانین کو ل منبجێ ژی د ئه‌نجاما ئێرشا فرۆکێن شه‌ڕی یێن تورکیا دا سه‌ربازێن رژێما سوریێ جانێ خوه ژ ده‌ست داینه.
چاڤدێرێن سیاسی دیار دکەن، تورکیا دڤێت بەردەوامیێ بدەنە ئێرشێن خوە، چونکی بەری نها تورکیا پلانەک ئامادە کریە و ل گۆر پلانا دەولەتا تورکیا وان دڤێت پڕانیا گۆندێن ل سەر سنۆرێ تورکیا و رۆژئاڤایێ کوردستانێ بدەنە چۆلکرن، دا پاشی بشێن پەنابەرێن سووریێ یێن کو نها ل تورکیا نە ل وان گۆندان بجه بکەن، ئەو یەک ژی پلانەکا دەمدرێژ یا تورکیا یە کو ب سالانە تورکیا دڤێت ب ڤی رەنگی دیمۆگرافیا رۆژئاڤایێ کوردستانێ بگوهۆڕیت، ژ بەر هندێ ژی پشتی هەلبژارتنان و سەرکەفتنا ئەردۆغانی هێزێن تورکیا ب دژواری ئێرشی دەڤەرێن جودا جودا یێن رۆژئاڤایێ کوردستانێ و باکورێ سووریێ دکەن، مخابن هەتا نها دەولەتا سووریێ ژی نەشیایە وەکو پێدڤی بەرسڤا ئێرشێن تورکیا بدەت.
بەری نها فەهیم تاشتەکین ڤەکۆلەرێ ناڤدار یێ تورکیا ژی دیار کربوو، تورکیا نەشێت وەکو چەند سالێن بۆری دەست ب ئۆپەراسیۆنەکا بەرفرەه ل دژی رۆژئاڤایێ کوردستانێ بکەت، ژ بەر هندێ ژی تورکیا ب ئێرشێن ئەسمانی و ب رێیا فرۆکێن بێ فرۆکەڤان دڤێت بەردەوام ئێرشی رۆژئاڤایێ کوردستانێ بدەت و رەوشا رۆژئاڤایێ کوردستانێ ئالۆز بکەت، چونکی ئەمریکا رێ نادەت تورکیا دەست ب ئۆپەراسیۆنەکا بەرفرەه بکەت، ژ بەر هندێ ژی تورکیا ل سەر ستراتیژیەکا نوو کار دکەت و ئارمانجا سەرەکی یا تورکیا دروستکرنا ئالۆزیانە، چونکی تورکیا دڤێت خەلک کۆچبەر ببن دا ئەو بشێت پەنابەرێن سووریێ ل جهێ کوردان بجه بکەت.
ئەو یەک د دەمەکێ دایە کو بەری هەلبژارتنان سەرۆک کۆمارێ تورکیا رەجەب تەیب ئەردۆغان راگەهاند، وان دڤێت د پێنگاڤا ئێکێ دا ئێک ملیۆن پەنابەرێن سووریێ رەوانەی وەلاتێ وان بکەن، هەکە ئەو بشێن ل گەل شامێ دەست ب دانوستاندنان بکەن دێ ب رێیا شامێ ئەو کار هێتە کرن و هەکە نە تورکیا گەلەک رێیێن دی هەنە کو دشێت پەنابەرێن سووریێ رەوانەی وەلاتێ وان بکەت.
