ئێزدى كوردێن بێخشن (ئه‌گه‌ر رۆژا دیار بیت، پێدڤى ب رۆناهیا هه‌یڤێ ناكه‌ت)
هه‌موو ده‌رده‌سه‌ریێن ددیرۆكێدا هاتینه سه‌رێ نه‌ته‌وا كورد و هه‌یا رۆژا ئیرۆ ژ بێتفاقى و په‌رته‌وازه‌یا جهێ خوه د ناڤ ته‌ڤنێ جڤاكێ كوردان دا كریه یا ژ هه‌موویێ نه‌خوه‌شتر ئه‌وه هه‌ر كه‌س ب ئه‌ڤێ كێمانیێ دزانیت” سیاسه‌تا ژێكڤه‌كه، بسه‌ركه‌ڤه”، لێ دیسا ژى هه‌ر ل سه‌ر ڤێ ده‌هو دوویێ دبه‌رده‌وامن و “دانێ وان د قازانه‌كێ دا ناكه‌لیت”. ئه‌ڤ ل هه‌ڤ نه‌كرنه بۆیه سه‌ده‌م هه‌موو هه‌لێن ب ده‌ستڤه ئینانا مافێن نه‌ته‌وه‌یى دبه‌رهه‌ڤ دبه‌ر ئاڤێ دا بچن و ل داویێ ببن پاڵێن پووشى، نموونه هند دمشه‌نه مرۆڤ شه‌رم دكه‌ت رێز بكه‌ت لێ هه‌ما هوون و خوه‌دێ مێزه‌ى ره‌وشا نوكه بكه‌ن كانێ په‌رته‌وازه‌یا نه‌ته‌وا كورد گه‌هشتیه چ قۆناغ!!
په‌رته‌وازه‌یا هێزێن سیاسى و جڤاكى ئه‌ڤرۆ ل كوردستانێ گه‌هه‌شتیه ئاستێ هه‌رى بلند و مه‌ترسیدار لێ د سه‌ر ڤێ هه‌موویێ ڕا كار بگه‌هته ته‌خه‌كا هه‌ره ڕه‌سه‌نا جڤاكێ كورد “ئێزدیان” و مینا چیایێن كوردستانێ ب درێژیا دیرۆكێ خوه لبه‌ر هه‌موو هه‌وێن بهۆژاندن و ژ كۆك راكرنێ گرتین و ناسنامه و زمانێ مه پاراستى و پیرۆزى دایێ، “ئێزدى” كو ل ده‌ف هه‌ر كورده‌كى ب كوردێن ڕه‌سه‌ن دهێنه هه‌ژمارتن و جهێ سه‌ربلندى و شانازیا مه‌نه ، گومانا نه‌كوردبوونێ بێخنه پال و بازرگانیێ ب دۆز و خه‌م و كاره‌ساتێن وان بكه‌ن، بازرگانێن درێغیێ ب فرۆتنا هه‌ر پیرۆزیه‌كێ ناكه‌ن، تنێ به‌رووكێن وان دا گه‌رم ببن.
ره‌وشا كوردستانێ ب گشتى د قۆناغه‌كا پرى وه‌رگوهێز و وه‌رچه‌رخ دا دبووریت و ب ته‌ڤنه‌كێ مه‌ترسیدار وه‌رپێچایه و ئاسۆیه‌كا نه‌دیار ل به‌ندا كوردستانێ یه لێ ئه‌ڤه نابیته سه‌ده‌م كو ئه‌م بێده‌نگ و بێ هه‌لویست بین به‌رامبه‌رى ڤان بزاڤێن دهێنه كرن بۆ پتر په‌رته‌وازه‌كرنا ته‌ڤنێ جڤاكێ كوردستانێ.
ناهێت مانده‌ل كرن كو برایێن مه یێن ئێزدى گه‌له‌ك ئازار و جه‌فا كێشاینه و سه‌ده‌مێن ڤان ئازاران كورد بوون و ئایینێ پیرۆزێ وان بوویه، ئه‌و ئایینێ هه‌موو تێكستێن وى یێن پیرۆز ب زمانێ كوردى هاتینه نڤیسین، ب ڤى ره‌نگى پیرۆزى دایه گرنگترین خالا نه‌ته‌وبوونێ كو زمانه، ئه‌ڤجا ب چ ڕه‌نگ و ب كیژان مه‌تۆد و لۆژیكێ گۆمانێ دئێخنه ناسناما كوردبوونا ئێزدیان!!
ل سه‌ر ڤێ په‌رته‌وازه‌یا لایه‌نێن سیاسى یێن كوردستانى لێ هه‌موو ل سه‌ر بێ خشیا كوردبوونا ئێزدیان دكۆكن، ئێزدى خوه‌دى جهه‌كێ هه‌رى بلند و برێزن و شانازیێ ب وان دبه‌ن كو د سه‌ر وان گڤاشتن و هه‌وێن بهوژاندنێ(ته‌صهیر) دا ناسناما كوردبوونا خوه پاراستنه و به‌لكو ئه‌م كوردێن بوسلمان حه‌سوودیێ ب پاكیا كوردبوونا وان دبه‌ین.
بازاركرن ب ئازارێن ئێزدیان و دووركرنا وان ژ هه‌ڤ نه‌ژادنێن وان(كورد)، نه بزاڤه‌ك نوویه به‌لكو گه‌له‌ك كه‌ڤنه لێ هه‌موو بزاڤێن ب ڤى ره‌نگى ب هه‌روه و مایه پووچ ده‌ركه‌فتنه و ئه‌ڤ بزاڤێن نوكه دهێنه كرن، چاره‌نڤیسێ وان ژ یێن به‌رێ باشتر نابیت.
به‌رى نها ژى مه ژ په‌رله‌مانێ كوردستانێ داخاز كربوو كو هه‌ر پارته‌كا ب ناڤێ ئۆلى بهێته دامه‌زراندن، قه‌ده‌غه بكه‌ت، داكو بازار ب ئۆلى نه‌هێته كرن و ژ ئاراسته‌یێ خوه یێ پیرۆز ئه‌وژى پاكره‌وان كرنا مرۆڤیه ژ گونه‌ه و خرابكاریێ، ده‌رنه‌كه‌ڤیت. ب هه‌مان ره‌نگ دامه‌زراندنا پارته‌كێ ب ناڤێ ئێزدیان ژبلى زیانێ پێڤه‌تر تشته‌كى دن ل كوردێن ڕه‌سه‌نێن ئێزدى زێده ناكه‌ت و دێ ب ڤێ رێكێ داگیركه‌رێن كوردستانێ ده‌رزا ل نابه‌ینا مه زێده بكه‌ن و ڕه‌واتیا دۆزا كوردى بۆ كێشێن ناڤخوه‌یى و لا به‌لایى به‌ن، كو ئه‌ڤرۆ ژ هه‌رده‌مه‌كى زێده‌تر مه پێدڤى ب ئێكرێزیا نه‌ته‌وه‌یى هه‌یه و دا مینا مه‌لایێ جزیرى بێژین:
دل گه‌شته مه ژ دێرێ ناچم كنشته‌یێ قه‌ت
محراب وێ ب من ڕا وه‌ور دا بچینه لاله‌ش
