ئێزدی ل سـەردەمێ کـابینەیا نـەهـێ
نێچیرڤان شێخ شامۆ
پشتی سەرهلدانا بهارا 1991، ژبەركو ئێزدی وەكو ڕەسەنێن ڤێ ئاخێ ب بەردەوامی ب روح و ماڵ و حاڵ و قوربانیدانێن خوە پشكەك ژ بزاڤا نەتەوی یا گەلێ كوردستانێ و خەلكەكێ زۆرێ ماندی و مەزلوم بوونە، لەوما ل سەرهلدانا پیرۆز ئەگەر پێكهاتەیێن دیترێن كوردستانێ جارەكێ هەست ب ئازادیێ كربت، ئێزدیان دو جاران تام و بێهنا ئازادیێ كر، جارەكێ وەكو ئایین و بیروباوەر، جارەكێ وەكو ڕەسەنەتی و كوردبوون و نەتەوەیان وان.
پشتی قۆناغا دەستپێكرنا ئەزموونا حوكمرانیا هەرێما كوردستانێ، ل ژێر سێبەرا سیاسەتا حەكیمانە و ڕاسپاردەیێن بەردەوامێن جەنابێ سەرۆكێ ئاشتیخواز جەنابێ سەرۆك مسعود بارزانی، هەتا ڕادەیەكی زۆرباش قۆناغ بۆ قۆناغ ئێزدیان وەكو جڤاك و ئایین و تایبەتمەندی هەست ب ماف و ئازادی و هەبوونا خوە كرن، د ڤێ قۆناغا دەستپێكی دا ل كابینەیێن حوكمەتێن ڕێزدار نێچیرڤان بارزانی دا گرنگیەكا تایبەت بۆ جڤاك و ئاینێ ئێزدیان هەبوو و كار و خزمەتێن گەلەك باش ل وی دەمی هاتنە پێشكێشكرن.
د سەردەمێ نوكە دا ل كابینەیا نەهێ یا حوكمەتا هەرێما كوردستانێ دا ب سەرۆكاتیا ڕێزدار كاك مەسرۆر بارزانی د ماوەیێ شەش سالێن بوورین دا قۆناغەكا جیاواز یا ئاڤەدانكرنا كوردستانەكا بهێزتر و ئاڤەدانتر مینا شۆرشەكێ ژبۆ دامەزراندنا ژێرخانا ژیانەكا ژهەژی بۆ هەموو خەلك و پێكهاتێن كوردستانێ دەستپێكر. ئەڤڕۆ ب زەلالی دهێتە دیتن و هەست دكەین خەونێن چەندەها سالان یێن خەلك و پێكهاتەیێن كوردستانێ ژبۆ پێدڤیێن دەستپێكی یێن ژیانێ هێدی هێدی یێ دبنە ڕاستی و ل سەر عەردێ دهێنە دیتن. ئەڤڕۆ ئەلكتیریكا 24 دەمژمێری و ڕێك و پرێن ستاندارتێن نێڤدەولەتی و ئاڤەكا پاقژ و خزمەتگوزاریێن دیتر یێن ژیانێ و سەدان پڕۆژەیێن ستراتیژی یێن بووینە هیڤیەكا مەزن ژبۆ ژیانەكا بەختەوەرتر و كوردستانەكا گەشتر و ئاڤەدانتر.
سەرەرای وان قەیران و شەڕێن سیاسی و گڤاشتنێن بەردەوامێن ناحەزان لێ ب خوەڕاگری و پشتگیریا خەلكێ كوردستانێ كابینەیا نەهێ ب ڕێبەریا سەرۆك وەزیران ڕێزدار مەسرۆر بارزانی ب ئیرادەیەكا قاهیم وەكو موعجیزەیەكێ ئەڤ هەموو پێشكەفتن و خزمەتگۆزاری و پڕۆژەیێن ستراتیژی و بنەجی بێ جیاوازی ل هەموو پارێزگەه و ئیدارێن سەربەخۆ و قەزا و ناڤچەیێن هەرێما كوردستانێ ب ئەنجام گەهاندینە.
ئێزدی ژی وەكو پشكەك ژ جڤاكا كوردستانێ وەكو هەر وەلاتیەكی ژ وان پڕۆژە و خزمەتێن ژێرخانەیا ژیانێ یێن كابینەیا نەهێ پێشكێش كرین مفاداربووینە، لێ گرنگە ئەم وێ ڕاستیێ بێژین كو كاك مەسرۆر بارزانی هەر ژدەستپێكا دەست ب كاربوونا خوە ب چاڤەكی تایبەت تەماشای تایبەتمەندیا ئێزدیان كریە و هەولدایە ل گۆڕەی ڕەسەنەتی و نەهامەتیێن ب سەرێ وان هاتین خزمەتا ڤێ ئۆلا ڕەسەن بهێتەكرن و چەندین كار و پڕۆژە و دەستپێشخەریێن جوان پێشكێشی جڤاكا ئێزدیان كرینە و فەرە ب وژدان د چەند خالاند ا دیارترین خزمەت و پڕۆژەیێن كابینەیا نەهێ ژبۆ جڤاك و ئایینێ ئێزدیان ڕێز بكەن:
1-ئاڤاكرنا قەسر و دیوانخانەكێ بۆ بابە شێخێ ئێزدیان كو د واتایا ڕەسەن دا مالا هەر ئێزدیەكی یە و ژبۆ خزمەتا وان یا ئۆلی و جڤاكی یە.
2-دابینكرنا مووچەیەكی هەیڤانە ژبۆ زەلامێن ئایینێ ئێزدیاتیێ وەكو ڕێزلێنانەك.
3-دروستكرنا دەروازەیێ سەرەكی یێ پەرستگەها پیرۆزا لالش ب شێوازەكی كەڤنار و لایق.
4- دروستكرنا كارگەها گڤاشتنا زەیتوونا و چێكرنا زەیتێ د هندروێ پەرستگەها لالش دا ژبۆ خزمەتا ڕێورەسمێن ئۆلی.
5-دروستكرنا عمبارەكا ئاڤێ دگەل هەموو پێدڤیێن وێ ژبۆ پەرستگەها لالش.
6-دروستكرنا جووتسایدێ پەرستگەها لالش ژ دەروازێ سەرەكی هەتا كو هندروێ پەرستگەهێ.
7-دروستكرنا جۆتسایدێ شێخان بۆ پەرستگەها لالش ب شێوازەكی سەردەمیانە و ڕێكوپێك، هەروەسا بڕیارا دروستكرنا جۆتسایدەكێ دیتر كو ژ زالگەها باعەدرێ دهێتە سەر هەمان جۆتساید، ب ڤێ چەندێ خزمەتەكا مەزنا زیارەتكارێن پەرستگەها لالش دهێتەكرن و ئێدی كێشەیێن ڕێكێ هاتنوچوونێ نامینن.
8-ژ ڕوویێ ڕەوشەنبیری و جڤاكی ڤە پشتەڤانیا دارایی ژبۆ كار و خەباتا بنگەهێ لالش وەكو سازیەكا ڕەوشەنبیری و جڤاكی یا تایبەتمەند ب ئێزدیان ڤە یا بەردەوامە، هەروەسا سەخبێركرنا هۆلێن لالش یێن جڤاكی ل گۆڕەی پێدڤیان.
9- د دەستپێشخەری و ڕێزلێنانەكا ژ هەژی دا جەنابێ سەرۆكێ حوكمەتێ بەخشینەكا هەیڤانە ژبۆ وان ئێزدیێن ژ دەستێ تیرۆرستان ڕزگاربووین دابینكر و دیسا دابینكرنا دەلیڤەیێن خواندنێ بۆ ڤی خەلكێ زولم دیتی و عەزیز.
10-د جۆمگەیێن ئیداری دا چەندین پۆست و پلەیێن تایبەت ب ئێزدیان هاتنە بەخشین.
11-كۆمەلگەهەكا وەكی خانكێ بڕیارا ناحیەبوونا وێ هاتە دەركرن و د ماوەیەكی كێم دا سنوورێ 11 ملیار دیناران خزمەتگۆزاری بۆ ڤێ ناحیا ئێزدینشین هاتنە پێشكێشكرن.
12- پڕۆژەیێ نووژەنكرنا مەزارگەها (عەڤدێ رەش) ل دێرەبوونێ دەڤەرا هەوێریا كو مەزارەكی ئۆلی یە ل سنوورێ ئیدارەیا زاخۆ، هەم خزمەتا ئۆلی یە هەم كەلتووری و گەشتیاریە بۆ خزمەتا خەلكێ دەڤەرێ كار تێدا بەردەوامە.
چەندین كار و پڕۆژەیێن دیتر بەرهەمێ دلسۆزی و خەمخۆریا ڕێزدار مەسرۆر بارزانی نە بۆ ئێزدیان، ئەڤ یەكە جهێ پێزانینا جڤاكا ئێزدییە و هەلگرا گەلەك پەیامێن كوور و سروشتییە، ئەڤ سەرەدەری و سیاسەتە تەكەزیێ دكەت ل ڕەسەنەتی و كوردبوونا ئێزدیا وەكو بەشەكێ سەرەكی و ڕەسەنێ كوردستانێ، دیسا نیشان و پەیاما وێ پێكڤەژیانێ یە یاكو چاڤكانیا وێ ژ فەلسەفە و ڕێبازا پیرۆزا بارزانی دهێت و ئەڤڕۆ ل ژێر سێبەرا جەنابێ سەرۆك بارزانی دا دهێتە خوەدیكرن و پەیڕەوكرن، هەروەسا پەیامەكا زەڵالە بۆ وان نەحەزێن ئێزدیا و كوردستانێ ئەوێن بەردەوام دەستێن فتنێ و دوبەرەكیێ درێژ دكەن و دەنگێن كەرب و كینێ د ناڤبەرا ئێزدیا و پێكهاتێن دیترێن كوردستانێ دا بلند و بەلاڤ دكەن.
ب دیتنا مە ئەڤ ئەزموونا حوكمڕانیا ڕێزدار مەسرۆر بارزانی د شەش سالێن بوورین دا دەستپێكەكا زۆرا باش بوو بۆ كار و خزمەتێن ژ هەژیتر بۆ جڤاكا ئێزدی و كوردستانێ ب گشتی و ئەم چاڤەرێی كار و بەرنامە و گاڤێن گەلەك مەزنترن ل داهاتی دا.
ل داویێ دبێژینە جەنابێ سەرۆكوەزیران ڕاستە هوون پەروەردەیێ دەستێ جەنابێ سەرۆك بارزانینە، ڕاستە هوون ئەندازیارێ ئاڤاكرنا كوردستانەكا بهێزترن، ڕاستە هوون برا گەورەیێ گەلن و هیڤی و ئۆمێدا ئەڤڕۆ و ئایندەنە، ل ژێر ڕێبەرایەتی و ڕاسپاردەیێن سەرۆك و ڕێزانێ گەلێ مە جەنابێ سەرۆك بارزانی و خەمخۆری و خوەڕاگریا جەنابێ سەرۆكوەزیران كاروانێ ئاڤەدانیێ ب بەردەوامی د ڕێیەكا ڕاستڕا دمەشە و پێشڤەدچە.
