ئێشـانا پێیێن زارۆیان هـندەک جـاران گرێدای کـێمیا ڤیتامـینانە
د. ئومێد عدنان بامەرنی، تایبه‌تمه‌ندێ نه‌خۆشیێن زارۆكان و نه‌خۆشیێن گرێكا دیاركر ئه‌گه‌رێن ئێشانا پێن زارۆكان گه‌له‌كن، یێن نورمال ئەون یێن ژ گه‌شا زارۆكی ده‌سپێدكه‌ن و هه‌تا دگه‌هیته نه‌خۆشیێن گران ژی دبنه ئه‌گه‌رێ ئێشانا پێیان، و ل هه‌می تەمەنا ده‌سپێدكه‌تن، ب تایبه‌ت دژیێ دەسپێکا برێڤه‌چوونا زارۆكی ددەما سێ تا پێنج سالیێ دا، چونكو ژیێ گه‌شه‌كرنا زارۆكی یه و دڤی ته‌مه‌نی دا زێده‌تر پێن وان د ئێشن، وگۆت: به‌لێ پێدڤیه ئه‌م دوپاتكه‌ین كا ژ گه‌شه‌كرنێ یه و چ ئاریشێن دی نینن، چونكو هنده‌ك جاران كێماسیا خوینێ یه یان كێمیا مادێ ئاسنی یان فیتامین دی و مه‌گنسیومن، ئه‌ڤه پێكهاتێن هه‌ستی نه ده‌ما كێم دبن هه‌ستی د ئێشن، جاران هه‌ودانێن هه‌ستی بخوە دبنه ئه‌گه‌ر، ئیشانێن جوراو جور و تا په‌یدا دبن، و گۆتژی: روماتیزم و نه‌خۆشیێن گران دبنه ئه‌گه‌ر چ نه‌خۆشیێن خوینێ یێن گران یان نه‌خۆشێن هه‌ستیان یێن گران دبنه ئه‌گه‌رێ ئێشانێ به‌لێ یا هه‌ستی ره‌نگه جهه‌ك بتنێ بیت، و ده‌ما ئێشان ل پێیه‌كی ب تنێ بیت ئه‌م زێده‌تر دۆیفچوونان بو دکەین.
د. ئومێد عدنان دیاركر ژی ده‌مێ ژیێ زارۆکیی تا پێنج سال بیت ئێشانا پێیان هه‌بیت و جارجار ئێشان هەبیت، ئه‌و ژیێ گه‌شەکرنێ یه، تشته‌كێ نورماله و ئه‌گەر ئێشان نه‌بوو رێگر د ئه‌نجامدانا كارێن خۆ یێن رۆژانه چ مه‌ترسی نینه ، وگۆت: وی ده‌می ئێشان نه‌یا نورماله، بەلێ ده‌ما پێ ئێشانێ تا ژی دگه‌ل بیت یان هه‌ودانه‌ك دی د له‌شی دا هه‌بیت، یان چ مفایی ژ چاره‌سه‌ریان وه‌رنه‌گریت و كارتێكرن ل سه‌ر ژیانا وی یا رۆژانه هاته‌كرن، چ ل سەر نڤستنێ چ ل سه‌ر هاتنوچوونا وی، ئه‌ڤه نیشانێن مه‌ترسیێ نه و پێدڤیه ب زووترین ده‌م سه‌ره‌دانا نۆشداری بهێته‌كرتن، وگۆتژی: چاره‌سه‌ریا ڤان ئێشانا ل دویف ئه‌گه‌ران دهێته‌كرتن، ئه‌گه‌ر یا گه‌شێ بیت، ره‌نگه ب تنێ ئارامكه‌ره‌كێ بده‌نێ، كێماسیا ئاسنی یان فیتامینا بیت دێ وان ده‌ینێ، و ئه‌گه‌ر نه‌خۆشیێن گران بن دیسان دێ ل دویف نه‌خۆشیێ چاره‌سه‌ریێ ده‌ینێ. و گۆتژی: پێدڤیه دایك و باب بزانن پێلاڤ گه‌له‌ك یا گرنگه بو زارۆكی، ئه‌و پێلاڤێن قه‌وسا پێی نه‌بیت، زێده‌تر دبنه ئه‌گه‌رێ ئێشانێ، گه‌له‌ك جارا مال هزر ناكه‌ت گه‌شا زارۆكی یا بله‌زه و پێن وی زۆی مه‌زن دبن دێ پێلاڤ یا ته‌نگە و دبیته ئه‌گه‌رێ ئێشانێ، پێدڤیه چاڤدێریا وان بكه‌ن و هەکە تشته‌كێ نه نورمال ده‌ف زارۆكی دیت زوی پرسیارا ئاریشه‌یێن وی بكه‌ن.
