ئێكرێزیا مە، دلتەنگیا وان
غیاس خـالد زێباری
ب دەهان ساڵە بزاڤا رزگاریخوازیا كوردستانی و خەلكێ نشتیمانپەروەرێ كوردستانێ ب ئێش و نەساخیا نە تفاقیێ و دوبەرەكیێ دنالیت، ڤێ چەندێ كاریگەریەكا نەرێنی دروستكریە، هەرچەندە پشتی ئاڤاكرنا قەوارێ هەرێما كوردستانێ ل باشوورێ كوردستانێ ل سالا 1992 ب تایبەت پشتی ئاشتەوایا د ناڤبەرا پارتی و ئێكەتیێ دا و ئیمزاكرنا رێكەفتنەكا ستراتیژی د ناڤبەرا واندا هەتا سالا 2017 ێ كۆدەنگیەكا باش ل سەر پرسێن نشتیمانی و نەتەوایەتی هەبوو و كاریگەریەكا ئەرێنی یا باش ل سەر ئاستێ دبلۆماسی و ئارامی و سەقامگیری و ئاڤەدانیێ هەبوو و پرسا كورد و كوردستانی گەهشتە ئاستەكێ باش، نهۆ ژی هەوڵێن باش د هێنەدان بۆ ڤەگەراندنا وێ باوەریێ ب تایبەت پشتی كابینا دەهێ یا حوكمەتا هەرێما كوردستانێ . كوردان راست گۆتیە كو ئێكگرتن بەرێ نبیاتێ سەركەفتنێ یە، وێ ئێكگرتنێ هەرێما كوردستانێ گەهاندە ڤی ئاستی، نهۆ ژی پرۆژێن ئاشتی و ئێكرێزیا هێزێن كوردستانی بەرفرەهتر بوویە و سنوورێن هەرێما كوردستانێ دەرباز كرینە ب تایبەت پرۆژێ ئاشتیێ ل توركیا و رۆژ ئاڤایا كوردستانێ، سەربۆڕ دیدەڤانن كو خەلكێ كوردستانێ چەند ب ئێكرێزیا سیاسی دلخۆش و بەختەوەر دبن نەیارێن ئازادیا گەلێ كورد هند پێ دلگران و نە ڕحەت دبن، لەوما هەردەمێ گاڤێن ئێكگرتن و ئێكرێزیێ دهێنە هاڤێن، ل بەرامبەر پلان دهێنە داشتن، كۆنگرێ قامشلۆ یێ ئێكگرتن و ئێكگۆتاریا سیاسیا كوردستانی ل رۆژئاڤایێ كوردستانێ ب هەوڵ و دەسپێشخەریێن سەرۆك مەسعود بارزانی و پشتەڤانیا سەرۆكێ هەرێما كوردستانێ نێچیرڤان بارزانی گاڤەكا زۆرا گرنگ و ل دەمێ خوە دابوو، چونكی پشتی گۆهرینێن ل سووریا هاتینە كرن، هەتا نهۆ دەستهەلاتا نوو یا سووریا چ گاڤێن پراكتیكری نەهاڤێتینە و داخۆیانیێن ئەرێنی نەداینە بۆ پارستن و دابینكرنا مافێن خەلكێ رۆژئاڤایێ رەنگە ئێك ژ ئەگەرێن ڤێ چەندێ نە تفاقی و دوبەرەكیا ئالیێن كوردی بیت ل رۆژئاڤا, لەوما ل سەر ئاستێ سەرۆككۆمارێ سووریا نەڕازیبوون بەرامبەر وی كۆنگرێ ئێكبوونا كوردا هاتە دەربڕین، هەر وەسا دەنگێن نەڕازیبوونێ لناڤ توركیا ژی بلند دبن، لێدانا بنگەهێن پێشمەرگەهێن كوردستانێ ژی ل دەڤەرا ئامیدیێ ب دروونا ژ ئەنجامێ وی كۆنگەریە، ئەڤ دلگرانی و گاڤێن نەیارێن ئاشتیێ و ئێكگرتنا كوردان ل سەر ئاستێ نیڤدەولەتی دیار دبیت كو ئێكگرتن و ئێكرێزیا كوردا كا چەندا گرنگ و پێویستە، ئەڤ هەوڵ و دەنگێن نەڕازی دیدەڤانن كو ئێكهەولویستیا سیاسی یا كوردا دێ كوردا كەنە كارئەگتەرێن كاریگەر ل گوهۆرینێن دەڤەرێ، لەوما پێدڤی یە ب لەز بهێتە بەرفرەهتركرن.
