ئێكرێزییا كوردان ژ كیڤە دەركەت؟
ئارام دهۆكی
هەرچەندە د هەردەمێ ل كوردان قەومییە و كورد كەفتینە د كاودانەك بەرتەنگ دا، كوردان ب كێم ـ زێدە؛ هاتینە ل جەم هەڤ و بەرەڤانی ژ كێشە و ئالۆزیێن خۆ كرینە، لێ ئەڤە جارە ب رەنگەك زۆر بەربەلاڤ هەڤگرتنەك سەرانسەری پەیدابوویە؛ چ ل سەر ئاستێ ناڤخۆی بیت یانژی ل سەر ئاستێ دەرڤە كو رەڤەندا كورد وەكو لۆبیەك ب هێز ئەڤ ئێكە ئەنجامدایە. هەر چەندە دبیت ئەگەر زۆر بن؛ لێ یێن هەرە سەرەكی؛ خۆ ل ڤان خالێن خارێ هەڤپشك دكەن:
ـ شۆرشا رۆژاڤا ببوو بەرخۆدانەك جەماوەری و شییا ببە ئەگەرێ تێكشكانا تاریترین هێزا تێرۆرا جیهانی یا كو د گۆتنێ داعش و ئەڤ ئێكە باش زەلال بوو د بەرەڤانیێ ژ نە كەتنا كۆبانێ.
ـ پشكداریكرنا كچ و ژنێن كورد ب ئاوایەك وێرەكانە كو ئەڤە ژی دبیتە خالەك شەرفمەندە د سایكولۆژیا مێرێ كوردان كو تەخمینا وان دا ژن پێگەیەك بلند هەیە د جڤاكێ دا بۆ گوهۆرینا ورەیا خۆپارستنێ و بەگریێ دا. بۆ نموونە كورد هەموو ب وێ كریارا هاڤێتنا كچا كورد د ئاڤاهكیەكی دا داخباربوون ب كوشتی یان بڕینا كەزیا وێ كچكا پشتی شەهیدبووی ژ لایێ داعشێ رویرەش ڤە.
– هەموو پارچەیێن كوردان وێ ئێكێ باش دزانن كو هەردەمێ رۆژاڤا كەت و دۆرا پارچێن دییە ب تایبەتی ل هەرێما كوردستانێ؛ كو ئەڤە سەرێ چەند سالانە حوكمەكێ خۆسەری دئێت برێڤەبرن.
– غەدر و خیانەتكرن ل كوردان د دیرۆكێ دا؛ ب تایبەت ژ لایێ ئەمریكاڤە كو ئەڤە خەمەك دیرۆكییە د مەژیێ هەر كوردەكی دا و ئەڤ خیانەتا ل رۆژاڤا خیانەتەك سۆر و سۆرە و هەموو كوردان ڤەدگریت.
– هاتنا رژێما نوو یا سووری كو ب پشتەڤانیا راستەخۆ یا دوژمنێن كوردان ئانینە سەر حوكمی، نەمازە رۆلێ توركیا راستەوخۆ تێدایە كو دوژمنێ سەرسەختێ كوردانە.
– دووراتییا سەركردایەتیا كوردی ل رۆژاڤا ژ گەندەلیێ و خۆدان بەرخۆردەك رۆهن ئاشكەرا د بیاڤێ گۆرەپانا شەڕی دا ل گەل شەڕڤانان؛ نەمازە یێ سەركردە مەزلۆم عەبدی د بیاڤێن شەڕی و دانوستاندنان دا.
– كوردان ل هەر سێ پارچەیێن دن؛ خۆ ب قەرزدارێن رۆژاڤا دیتینە، ژ بەركو بەردەوام كوردێن رۆژاڤا درێغی د پشتەڤانیا پارچێن دن یێن كوردستانێ دا نەكریە، هەر چەندە ئەڤ خالە نهێنیە لێ هەر كەس ئاگادارە كوردبوونا رۆژاڤایان هەردەم یا خورت بوویە.
هەلبەت وەكو مە ئانی زمان دبیت گەلەك خالێن دن هەبن لێ ب من وەرە ئەڤە د سەرەكینە. خالا لاواز یا كوردان د هەڤكێشەیێن مینا رۆژەڤا ئەڤرۆ دا؛ تەنێ كورد پشتا هەڤ دگرن؛ ل دەما لێ دقەومیت و جارەك دن ساڕ دبن یانژی ل دژی هەڤ كاردكەن ژ بیردكەن كو ئەوان كێشەك بەردەوام هەیە و دڤێت بەردەوام د ئێكگرتی بن، نەتنێ ل دەمێ قڕكرنا وان دئێت. خورتبوونا ڤێ بیرۆكەیا ئێكگرتنا د رۆژا ئەڤرۆ دا د دكەڤە سەر رەڤەندا كوردی كو لربیەك بەرفرەه دروستكەن و ئێكگرتنەك سەرتاسەری یە كۆمەلەیێن كوردی هەبە؛ ب ئێك دەنگ و رەنگ ل كێشەیا گەلێ خۆ ببن خۆدان.