ئێكهتیا ئاسیا سیستهمێ نوو بۆ ڤاڤارتنێن مۆندیالا 2026ێ پهسهندكر
ئهڤرۆ،
لژنا جێبهجێكار ل ئێكهتیا تهپا پێی یا ئاسیا سیستهمێ نوو بۆ ڤاڤارتنێن كێشوهرێ ئاسیا دهربازبوون بۆ كۆپا جیهانی مۆندیالا 2026ێ پهسهندكر پشتی بوویه خودانا ههشت كورسیێن مۆندیالێ كو بڕیاره بۆ جارا ئێكێ 48 ههلبژارتیێن جیهانێ پشكداریێ بكهن ئهوا دهێته چاڤهڕێ كرن ههرسێ وهلاتێن ئهمریكا، مهكسیك و كهنهدا مێڤانداریا وێ بكهن.
لدووڤ بڕیارا ئێكهتیا ئاسیا دی شێوازێ ڤاڤارتنان بڤی رهنگی بیت، قۆناغا ئێكێ یا ڤاڤارتنان دێ یا ههڤپشك بیت بۆ 22 ههلبژارتیان ئانكۆ دناڤبهرا ههلبژارتیێن دهربازبوویی بۆ جاما ئاسیا یا 2027ێ و ههلبژراتیێن بهرههڤیا بۆ ڤاڤارتنا مۆندیالا 2026ێ داكهن ئهوێن پلهدار د لیستا جیهانی دا دناڤبهرا رێزبهندیا 26 بۆ 47ێ، ههموو ههلبژارتی دێ ههڤڕكیێ بۆ 11 پلێتێن دهربازبوونێ بۆ قۆناغا دویێ كهن.
د قۆناغا دویێ دا 36 ههلبژارتی دێ پشكداربن ژوانا ئهوێن د پلهداریا وان ژ ئێكێ ههتا 25ێ ل گهل ئهوان 11 ههلبژارتیێن قۆناغا ئێكێ دهربازبووین كو دێ هێنه بهلاڤكرن ل سهر نهه كۆما، ههر كۆمهك چار ههلبژارتی نه ب شێوێ خول هاتن و چوون یاریێ كهن، دو ههلبژارتی ژ ههر كۆمهكێ دێ دهربازبنه قۆناغا دووماهیێ ئهوا هژمارا وان دێ بنه 18 كو دووڤدا دێ هێنه بهلاڤكرن ل سهر سێ كۆما، ههر كۆمهك شهش ههلبژارتی پشكداربن و یاریێن وان دێ ب شێوێ خول هاتن و چوون هێنه ئهنجامدان، دو تیم ژ ههر كۆمهكێ كو دێ بنه شهش ههلبژارتی ئێكسهر دهربازبنه مۆندیالا جیهانی 2026ێ.
پاشكۆیێ ئاسیا بۆ دو پلێتێن دی یێن دهربازبوونێ بڤی رهنگی بن، ئهو ههلبژارتیێن رێزێن سێیێ و چارێ یێن ههرسێ كۆما دێ دهێنه بهلاڤكرن ل سهر دو كۆمێن نوو پشتی پشككێشانێ و ههر ههلبژارتیهكێ رێزا ئێكێ یێ ههر كۆمهكێ دێ پلێتا دهربازبوونا ئێكسهر بۆ مۆندیالێ دهستخوهڤه ئینت كو سهرجهمێ وان دێ بنه ههشت ههلبژارتیێن ئاسیا بۆ مۆندیالا 2026ێ، ههمبهری وان ئهو ههلبژارتیێن رێزێن دویێ یێن ههردو كۆما هاتین دێ بۆ پلێتهكا دی یا پاشكۆ بناڤێ كێشوهرێ ئاسیا ههڤڕكیێ ل گهل كێشوهرێن دی كهت.
