ئێكه‌تیا ئورۆپا دێ ل دۆر ره‌وشا په‌نابه‌رێن ئه‌فغانی كۆمبیت
ئه‌ڤرۆ:
ئیراهیم كالین په‌یڤدارێ سه‌رۆك كۆماریا توركیا راگه‌هاند كو ره‌جه‌ب ته‌یب ئه‌ردۆغان ل گه‌ل ئه‌نجێلا مێركه‌ل و ڤیلاده‌میر پوتین ب رێیا ته‌له‌فونێ ئاخڤیه و بۆ وان دیار كریه كو بابه‌تێ هاتنا په‌نابه‌رێن ئه‌فغانی بۆ توركیا بوویه ئاریشه‌كا گه‌له‌ك مه‌زن و توركیا ب تنێ نه‌شێت بارێ گران یێ په‌نابه‌رێن ئه‌فغانی راكه‌ت و دڤێت وه‌لاتێن ئێكه‌تیا ئورۆپا و ئه‌مریكا هاریكاریا توركیا بكه‌ن.
په‌یڤدارێ سه‌رۆك كۆماریا توركیا ئه‌و یه‌ك ژی دیار كر كو بابه‌تێ هاتنا په‌نابه‌رێن ئه‌فغانی ئاریشه‌كا گه‌له‌ك مه‌زنه بۆ توركیا و هه‌موو ئێكه‌تیا ئورۆپا، چونكو رۆژانه ب هزاران په‌نابه‌رێن ئه‌فغانی به‌رێ خوه دده‌نه توركیا و توركیا ژی ئه‌و شیان نینن كو بشێت وان هه‌موو په‌نابه‌ران خوه‌دان بكه‌ت، ژ به‌ر هندێ ژی دڤێت ئێكه‌تیا ئورۆپا ب ئه‌ركێ خوه رابیت و هاریكاریا توركیا بكه‌ت، هه‌كه وه‌سا نه‌بیت توركیا دێ رێگریێ ل هاتنا په‌نابه‌رێن ئه‌فغانی كه‌ت كو ئه‌و یه‌ك ژی دێ بیته ئه‌گه‌رێ روودانا كاره‌ساتێن مرۆڤی.
ل ئالیێ دی وه‌زاره‌تا ده‌رڤه یا ئه‌لمانیا راگه‌هاند كو ئه‌نجێلا مێركه‌ل داخواز ژ ئیمانوێل ماكرۆن سه‌رۆك كۆمارێ فره‌نسا و به‌رپرسێن دی یێن ئێكه‌تیا ئورۆپا كریه كو ل دۆر ره‌وشا ئه‌فغانستانێ كۆمبن، چونكو وه‌كو ئه‌ركه‌ك مرۆڤاتی دڤێت هنده‌ك ژ وان په‌نابه‌رێن ئه‌فغانی بهێنه وه‌رگرتن كو ژیانا وان ل ئه‌فغانستانێ د مه‌ترسیێ دایه.
