ئێكه‌تیا ئۆرۆپا هۆشداریێ دده‌ته ئیرانێ
ب، سه‌رجان مه‌حمود:
سه‌عید خه‌تیب زاده په‌یڤدارێ وه‌زاره‌تا ده‌رڤه یا ئیرانێ راگه‌هاند كو دو گه‌میێن په‌ترۆلێ یێن یونانێ ژ به‌ر كو یاسایێن ده‌ریایی بنپێ كرینه ژ ئالیێ هێزێن وان ڤه هاتینه ده‌سته‌سه‌ركرن و د هه‌مان ده‌می دا به‌رسڤه بۆ كریارا نه قانوونی یا یونانێ و گۆت: (د ره‌وشا نها دا گه‌میه‌كا مه یا په‌ترۆلێ د ده‌ستێ یونانێ دایه و حوكمه‌تا یونانێ یاسایێن نێڤده‌وله‌تی بنپێ كریه و ل سه‌ر داخوازا ئه‌مریكا گه‌میا مه یا په‌ترۆلێ ده‌سته‌سه‌ر كریه و مه ژی مافێ خوه یێ به‌رسڤداینێ بكار ئینایه و هه‌تا ده‌وله‌تا یونانێ گه‌میا مه ل گه‌ل كارمه‌ند و په‌ترۆلا مه ئازاد نه‌كه‌ت، ئه‌م ژی گه‌میێن یونانێ ئازاد ناكه‌ین و ژ دروستبوونا ئالۆزیان ئه‌مریكا و حوكمه‌تا یونانێ به‌رپرسیارن و جاره‌كا دی دوپات دكه‌ین ل هه‌مبه‌ر هه‌ر كریاره‌كا ل دژی وه‌لاتێ مه دێ ب هه‌مان ره‌نگی به‌رسڤێ ده‌ین).
نیكۆس دیندیاس وه‌زیرێ ده‌رڤه یێ یونانێ ژی راگه‌هاند كو حوكمه‌تا ئیرانێ ل ژێر ناڤێ ده‌وله‌تێ ب ره‌نگه‌كی نه قانوونی دو گه‌میێن وان یێن په‌ترۆلێ ده‌سته‌سه‌ر كرینه و گۆت: (ده‌وله‌تا ئیرانێ ب كریارێن خوه یێن تێكده‌رانه هه‌ول دده‌ت په‌یوه‌ندیێن هه‌ی ئالۆز بكه‌ت و ئه‌م ب چو ره‌نگه‌كێ ل هه‌مبه‌ر زۆرداریا ئیرانێ بێده‌نگ نامینین).
ل ئالیێ دی وه‌لاتێن ئێكه‌تیا ئۆرۆپا ژی هۆشداری دانه ئیرانێ كو بزاڤێن وێ دێ بنه ئه‌گه‌رێ هندێ كو ره‌وشا هه‌ی پتر ئالۆز بیت و داخواز ژ ئیرانێ كرن كو د زووترین ده‌م دا هه‌ر دو گه‌میێن یونانێ ئازاد بكه‌ت و ب فه‌رمی داخوازا لێبۆرینێ بكه‌ت.
