ئێكڕۆژیكرنـا تـازیـان
عەبدولرەحمان مەحموود
پشتی بابەتێ كێمكرنا تازیان بوویە باسێ گەرمێ جادێ و سوشیال میدیایێ، بڕیال ل سەر كێمكرنا ڕۆژێن تازیا ژلایێ ڕێڤەبەریا ئەوقافێ ڤە هاتە دان و تازی بوون ئێك ڕۆژ بتنێ، بنێڕینا من بڕیارەكا دجهێ خۆ دابوو، هەرچەندە دجڤاكا كوردەواری دا پەیوەندیێن مرۆڤایەتی و دوستایەتی دخورتن، لەومان ئەو دەما كەسەك دچیتە بەر دلوڤانیا خۆدێ هەركەسەكی دڤێت بەژداریێ د تازیا وی دا بكەن و سەرخۆشیێ ل كەس و كارێن وی بكەن. ڕەنگە ب حكمێ دووراتیا جهی و كار و بارێن ڕۆژانەیێن مرۆڤی و نەگەهشتنا دەنگۆباسێ وەغەركرنا كەسێ وەغەركری مرۆڤ د ڕۆژا ئێكێ دا بەشداریێ د تازیا وی دا نەكەت، لێ ئەڤە نابیتە بەهانە یانژی ئاریشەكا هندا مەزن و مرۆڤ شەرم ژ كەس و كارێن مری بكەت. بەلكو مەگەلەك ڕێكێن دی هەنە ئەم سەرخۆشیێ ل كەس و كارێن مرۆڤێ وەغەركری بكەین، چ ب ڕێكا پەیوەندییەكا تلەفونی بیت یانژی پشتی ڕۆژا تازیێ ڕۆژەكێ بچیتە مالا كەسێ وەغەركری و سەرخۆشی و هەڤخەمیا خۆ بۆ دەرببڕیت، هەلبەت هەر بڕیارەكێ باشی و خرابیێن خۆ هەنە لێ مرۆڤ پتر فۆكسا خۆ دێ ئێخیتە سەر لایەنێ باشێ بڕیارێ و ئەڤێ بڕیارێ ژی ب دیتنا باشیێن خۆ پتر هەنە ژ خرابیێن وێ، گەر باسێ لایەنێ باشێ ڤێ بڕیارێ بكەین، دبینین مەزاختیێن زۆر ل ڤان هەردو ڕۆژێن تازیا دهاتنە مەزاختن و بارگرانیەكا مەزنبوو بۆ خودانێن تازیا و گەلەك كەسان مەزاختیێن ڤان دو ڕۆژا قەردكرن و ئەڤێ چەندێ ژی خەما خودانێ مری گرانتر لێ دكر و هەتا وەلێ هاتبوو ئەگەر خارنا ڤان دو ڕۆژا نەیا بدلێ خەلكی با دا لۆمەیا مرۆڤی كەن و مرۆڤی بچاڤتاری و قەلس ل قەلام دەن، ئەڤجار ب ئێكڕۆژی كرنا ڕۆژا تازیا ئەڤ بارگرانییە نامینیت و بارێ لسەر ملێن خەلكی دێ سڤكتر لێهێت. هەر دیسان ڤان دو ڕۆژا قەرەبالغییەكا زێدە ل جادا درست دكر، كارتێكرن ل كار و بارێن خەلكی دكر و بڤێ بڕیارێ ئەڤ قەرەبالغیا ڤان دو ڕۆژا نامینیت و لڤینا جادا دێ یا ئاساییتر بیت، خۆیا یە تازیێن مە تا ڕاددەیەكی ژ چارچووڤێ خۆ یێ درست دەركەفتینە و پتر ڕۆیێ خۆ دەرخستنێ تێدا دیاردبوو ل جهێ ئەم ببینە فاكتەرێ ل سەر سڤكرنا خەما كەس و كارێن مری بەر و ڤاژی مە خەما وان گرانتر لێ دكر، نەخاسمە ب كامیرە و وێنەكرنا كەسێن بەرنیاس و جهێن ڤی ئای پی كەشێ تازیێ بەرەف ڕەوشەكا دیڤە دبر و مرۆڤی هەر های ژ تازیێ و خەما مری نە دما، ئەڤجار یا گرنگ ئەوە دەما كەسەك وەرغەردكەت لەزێ دڤەشارتنا وی دا نەكەن و هندی بشێن كەس و كار و هەڤال و دوست و نیاس و برادەرێن وی ئاگەهداربكەن و هەمی پێكڤە لسەر گۆڕستانێ بەژداریێ د ڤەشارتنا وی دا بكەن و سەرخوشیێ ل كەس و كارێن وی بكەن، پشتی هینگێ گەر هەر كەسەكی كارەكێ فەر، یان ئەو دەرفەتە نەبیت د ڕۆژا تازیێ دا بەژدارببیت، بلا كەس و كارێن مری بسنگەكێ بەرفرەه وەربگریت و ل وی كەسی نەگرن یێ بەژداری ژ ئەگەرێ نەبوونا دەرفەتێ د رۆژا بەهیێ دا نەكری.
