ئێكگرتنا پێشمه‌رگه‌ی مه‌زنترین سه‌ركه‌فتنه بۆ گه‌لێ كورد
بابه‌تێ ئیكگرتنا هێزا پێشمه‌رگه‌ی داخوازی و ئۆمێدا پتریا هێزێن سیاسی و هه‌موو خه‌لكێ كوردستانێ یه، هه‌تا كو ئه‌ڤ هێزه ببیته هێزه‌كا نشتیمانی و ب ئاخا كوردستانێ ڤه بهێته گرێدان و ژ بن ده‌ستهه‌لات و سه‌ركرداتیا پارتێن سیاسی بهێته ده‌ر، له‌ورا سه‌رۆك بارزانی ل چارشه‌مبیا رێكه‌فتی (31/12/ 2014) وه‌كو هه‌موو جاران هاته سه‌ر هێلێ و په‌یامه‌ك ئاراسته‌ی وه‌زاره‌تا پێشمه‌رگه‌ی كر و هۆشداری دا وان لایه‌نێن په‌یوه‌ندی ب ڤێ پرۆسێسێ ڤه هه‌ی كو پێدڤی یه ل سه‌ر بابه‌تێ ئێكگرتنا هێزا پێشمه‌رگه‌ی كاربكه‌ن و بێخنه د وارێ پراكتیكێ دا، دا كو ئه‌ڤ هێزه ببیته هێزه‌كا نشتیمانی و خه‌لكێ كوردستانێ ب هێزا خوه بزانیت. د ئه‌ڤرۆ دا ژ هه‌موو قووناغێن دی پتر ده‌م یێ گونجایه كو ئه‌ڤ هێزه بهێته رێخستن و ئێكگرتن ژ به‌ر كو ملله‌تێ كوردستانێ یێ ل به‌رامبه‌ر شه‌ڕه‌كێ خویناوی ل گه‌ل به‌ره‌یێ درنده‌ترین هێزا تیرۆرستیا جیهانی ب درێژاهیا (1500)كلم و ڤێ هێزا تیرۆرست چه‌كه‌كێ پێشكه‌فتی د ده‌ستاندایه و هێزه‌كا مه‌زنه و ئه‌ڤه هه‌ڕه‌شه‌یه ل سه‌ر هه‌بوونا گه‌لێ كوردستانێ و كارێ ڤێ هێزا درنده ژی سه‌ربرین و دزی و بێ هه‌تككرنا نامووسا خه‌لكێ بێ گوننه‌هه. واته یا ئاشكه‌رایه ئه‌ڤ توخمه خه‌وارجه درێژه پێده‌رێن كریارێن ئه‌نفالچیا و ئه‌نجامده‌رێن گوڕێن ب كۆمه‌لن.
یا دیاره ئه‌ڤ شه‌ڕه دێ درێژبیت و یا پێدڤیه بوو پشتی ڤێ قووناغێ ژی كورد خوه باش به‌رهه‌ڤبكه‌ن، هه‌روه‌سا ئه‌ڤ جۆره شه‌ڕێ كاره‌ساتبار بۆ مه ببیته وانه‌یه‌ك و د دیرۆكا هه‌ڤچه‌رخا كوردی دا بهێته نڤیساندن و ل پێش چاڤێن گه‌لێ كورد بمینیت و دا بۆ نه‌ڤیێن داهاتی ژی ئاشكه‌را ببیت كو چه‌ند كاره‌ساتێن مه‌زن نه‌یارێن مه یێن ب سه‌رێ گه‌لێ كورد ئیناین، له‌ورا یا پێدڤی یه ل سه‌ر هه‌موو لایه‌نێن سیاسی ب تایبه‌تی (پارتی و
ئێكه‌تی) كو د ڤێ قووناغێ دا د هاریكاربن د پرۆسێسا ئێكگرتنا هه‌موو یه‌كه‌یێن هێزا پێشمه‌رگه‌ی ل سه‌ر بنگه‌هه‌كێ توكمه بهێته ئاڤاكرن و ببیته هێزه‌كا ئێكگرتیا نشتیمانی و ب سه‌ر وه‌زاره‌تا پێشمه‌رگه‌ی ڤه بیت و په‌یڤدار و راگه‌هاندنا خوه یا تایبه‌ت هه‌بیت و هه‌ر داخۆیانیه‌ك بهێته‌دان ل سه‌ر سه‌ركه‌ڤتنێن پێشمه‌رگه‌ی ب رێیا په‌یڤداری ڤه بیت نه ب رێیا فه‌رمانده‌كێ له‌شكری یێ هه‌ر پارته‌كێ بیت. ژ لایه‌كی ڤه ئه‌ڤ هێزا له‌شكری یا ئێكگرتی ل گه‌ل هێزا ئابووری و یا دپلۆماسیا سه‌ركه‌فتی یا حوكمه‌تا هه‌رێما كوردستانێ دێ بیته ئه‌گه‌رێ مسوگه‌ركرن و سه‌رخستنا پرۆژێ (سه‌رۆك بارزانی) یێ ئاڤاكرنا ده‌وله‌تا كوردستانێ. ژ لایه‌كێ دیڤه هه‌موو جڤاكێ نێڤده‌ولی یێ چاڤدێریا ره‌وشا بارودۆخێ هه‌رێما كوردستانێ و هێزا پێشمه‌رگه‌ی دكه‌ت و وان پێ خۆشه ئێك هێزا له‌شكری یا ئێكگرتی ل كوردستانێ هه‌بیت و ل ژێر فه‌رمانا ئێك سه‌ركرداتیێ بیت ژ به‌ر وێ هاریكاری و پێدڤیێن له‌شكری یا بۆ پێشمه‌رگه‌ی دهنێرن، هه‌روه‌سا ده‌وله‌تێن هه‌ڤپه‌یمان شرۆڤه‌كرن و دیراسه‌تێ ل سه‌ر كریارێن پێشڤچوونێ و سه‌ركه‌فتنا پێشه‌رگه‌ی دكه‌ن ل سه‌ر ئه‌ردی و به‌رۆكێن شه‌ڕی، دا بزانن كوردان چ هێزه‌كا ئێكگرتی و كاریگه‌ر هه‌یه بۆ به‌ره‌ڤانیكرنا خاك و ئاینده‌یێ كوردستانێ و داكو ئه‌و بشێن درێژیێ بده‌نه وان هاریكاریا و به‌رده‌وامییێ بده‌نه هه‌ڤپه‌یمانیا خوه ل گه‌ل كوردان، له‌ورا د ڤێ قووناغێ دا ئێكگرتنا هێزا پێشمه‌رگه‌یێ كوردستانێ مه‌زنترین ده‌سكه‌فت و دیاری یه بۆ گه‌لێ كورد.
