ئێكەمین نەخۆشخانەیا تایبەت ب زاڕۆكان ڤە ل زاخۆ دێ هێتە ئاڤا كرن
زاخۆ، دلۆڤان هالۆ:
پێشتر چ نەخۆشخانەیێن تایبەت ب زاڕۆكان ڤە ل ئیدارەیا سەربخوە یا زاخۆ نەبوون، ب تنێ ب 20 ب تەختان چارەسەرییا نەخۆشان ل نەخۆشخانا زاخۆ د هاتە كرن، لەوڕا زاڕۆكێن نەخۆش د هاتنە ڕەوانەكرن بۆ نەخۆشخانا هیڤی، لێ د نوكە دا كار ل سەر ئاڤاكرنا ئێكەمین نەخۆشخانا تایبەت ب زاڕۆكان ڤە دهێتە كرن.
د. سیروان ئەحمەد، ڕێڤەبەرێ گشتی یێ ساخلەمیا زاخۆ بۆ ڕۆژناما ئەڤرۆ دیار كر، ئێكەمین نەخۆشخانا تایبەت ب زاڕۆكان ڤە ل نێزیك نەخۆشخانا ئافرەت و ژ دایك بوونێ ل ئیدارەیا سەربخوە یا زاخۆ دهێتە ئاڤا كرن، دوو هەیڤێن دی دێ ب دووماهی هێت و كەڤیتە د خزمەتا خەلكێ دا.
ڕێڤەبەرێ گشتی یێ ساخلەمیا زاخۆ، ئاماژە ب وێ چەندێ ژی كر، ئەڤ نەخۆشخانە ژ سێ قاتان پێك دهێت و دێ 90 تەخت تێڤە هەبن و 17 تەخت ژی بۆ زاڕۆیێن نە گەهشتی، ئەڤ نەخۆشخانە دێ ڕێژا90٪ێ یا ڕەوانەكرنا نەخۆشان بۆ نەخۆشخانا هیڤی ل دهۆكێ كێمتر لێ كەت.
گۆت ژی:»ڕەزامەندی هاتیە دان ژ لایێ حكومەتا هەرێما كوردستانێ ڤە بۆ كڕینا ئامیرە و پێدڤیێننۆشداری یێن ڤێ نەخۆشخانێ، كارمەند ژی دێ ئەو بن یێن نوكە ل نەخۆشخانەیێن مە ل بەشێ زاڕۆكان كار دكەن، مە ل بەرە هندەك كارمەندێن دی ژی داخواز بكەین، چونكی نەخۆشخانە یا مەزنە، هەروەسا دێ مە 12 نۆشدارێن تایبەتمەند ب زاڕۆیان ڤە هەبن».
