ئێكەم تاقیگەها شرۆڤەكرنا دەنگی ل زانكۆیا زاخۆ هاتە ڤەكرن
زاخۆ، دلۆڤان هالۆ:
بۆ ئێكەم جار ل سەر ئاستێ هەرێما كوردستانێ، تاقیگەهەكا شرۆڤەكرنا دەنگی یا تایبەت ب ڤەكۆلینێن زانستێن دەنگی ڤە ل كۆلیژا زانستێن مرۆڤایەتی یا زانكۆیا زاخۆ هاتە ڤەكرن.
دكتۆرا سەلوا فەریق، بەرپڕسا تاقیگەها شرۆڤەكرنا دەنگی ل زانكۆیا زاخۆ بۆ ڕۆژناما ئەڤرۆ دیار كر كو ب چاڤدێریا سەرۆكێ زانكۆیا زاخۆ دكتۆر نازم سلێمان و ب پشتەڤانیا گۆهدار شێخۆ، سەرپەرشتێ ئیدارەیا سەربخوە یا زاخۆ و ب ئامادەبوونا محەمەد، جێگرێ سەرپەرشتێ ئیدارەیا سەربخوە یا زاخۆ، و مشیر محەمەد، دەڤەردارێ زاخۆ و چەندین لایەنێن حزبی و حكومی ئێكەم تاقیگەها شرۆڤەكرنا دەنگی ل سەر ئاستێ هەرێما كوردستانێ بناڤێ (جەلادەت بەدرخان) ل كۆلیژا زانستێن مرۆڤایەتی یا زانكۆیا زاخۆ هاتە ڤەكرن.
بەرپڕسا تاقیگەها شرۆڤەكرنا دەنگی ل زانكۆیا زاخۆ، ئاماژە ب وێ چەندێ كر كو كارێ ڤێ تاقیگەهێ دێ ب ڕێكا هندەك ئامیرەیێن تایبەت بیت، دێ دەنگێن زمانێ كوردی ل دووڤ پۆلینێن زانستی و ئەكادیمی شرۆڤە كەت، دیسا دێ چاوانیا گۆتنا پەیڤ و ڕستەیان ب شێوەیەكێ سەردەمیانە دەتە دیاركرن.
