ئێكەم شەهیدا ژن ل شۆڕەشا ئیلۆنا مەزن
رەحیما بەرواری
ئەگەر ئەم لاپەرێن دیرۆكێ ڤەبدەین، دێ بینین كو گەلەك شێرەژنێن كورد هەنە كو مل ب ملێ شۆڕشڤانان و خەباتكەران ڤە جەنگینە، چ ب رێكا ئامادەكرنا نانی و ئاهێن خوارنێ یان گەهاندنا پێدڤیێن ساخلەمیێ بۆ ناڤ ڕێزین پێشمەرگەیان بیت. هەر وەسا خۆدانكرن و پەروەردەكرنا زارۆیان ژ لایێ وان ڤە زۆر یا ب زەحمەت بوو، ژبەركو ئەو شێرەژن ب ئەركێ دایك و بابی ژی رادبوون. دبیت گەلەك زارۆك هەتا گەهشتین ژییەكێ مەزن ژی ژنوی بابێن خۆ ددیتن ژبەر كو بابی چەكێ شەرەفێ ب ملێ خۆ ڤەكربوو و قەستا شۆرەشێ كربوون ل ناڤ رێزێن پشمەرگەی دا. درووشمێ وان «یان كوردستان یان نەمان» بوو و رێكا بەرسینگ گرتنا دوژمنان گرتیە و ڕوی ب ڕوی و بێ ترس جانێ خۆ گۆری ئاخا شرینا وەلاتی كریە. ئێك ژ نموونەیێن شێرەژنێن كوردان شێرەژنا شەهید (ئامینا عەبدوللا عەلی ئامێدی) یە، هەڤژینا (سەید عەبدوللا ئامێدی) یە یێ بەرنیاس ب (عەبێ ڕەش)، كو كۆڕێن وێ (حەسەن و حوسێن و سەلیم) پێشمەرگەبوون. ئێك ژوان شێرەژنایە كو ل بەرسینگا دوژمنێ خوین مێژ ڕاوەستیایە پشتی شەرەكێ گران كو دوژمنی ب فرۆكەیا ئامێدیێ بومبەباران كری مالا وان ژ ئامێدیێ دەركەفت و بوونە دو بەش، زەلامێن پێشمەرگە چوونە ل گەل هەڤالێن خۆ یێن پێشمەرگە و خێزانێن وان چوونە دەڤەرا نەهلێ گوندێ (درگنی). ڤێ شێرەژنێ كو دەیكا وان پێشمەرگەیان بوو گۆتە زەلامێ خۆ ئەز دێ ل دویڤ كۆڕێن خۆ ڕا چم و هاتە گوندێ (ریباری حەجی ئەحمدایە) كۆڕێن خۆ ببینیت، پشتی كۆڕێن خۆ دیتین ئەڤ شێرە ژنە» ئامینا خان «چوو ئامێدیێ دا كو بۆ وان ئاهێن خوارنێ بینیت و وێنەیەكێ رەحمەتی (مەلا مستەفا بارزانی) یێ جامكری ژ لایێ هەڤالێن رێكخستنا نهێنی تەسلیمی ڤێ شێرە ژنێ هاتەكرن و گۆتێ ل مال ڤەشێرە، دی پێدڤی بینێ بۆ كۆمبوونان و بیرەوەریێن نیشتیمانی. ژبەركو كۆڕێ وێ (سەلیم عەبدوللا) ئەندامێ ئێكەتیا قوتابی و لاوێن كوردستانێ بوو كو ل وی سەردەمی رۆلەكێ سەرەكی د شۆرشێ دا هەبوو. دەمێ شێرەژن»ئامینا» هاتیە سەر دەرەجێت دەرگەهێ ئامێدیێ مەفرزەكا ئەمنی ل وێرێ بوو هاتە دەستەسەركرن و شكایەت لێ هاتبووكرن كو ئەڤ ئافرەتە ئاهێن خوارنێ بۆ كۆڕێن خۆ دبەتە ناڤ رێزێن پێشمەرگەی. ئێك ژ وان ئەفسەرێن ئەمنی گۆتێ عەبایێ خۆ ڤەكە كا چ ل بن هاتیە ڤەشارتن و دوسێ جاران لێ كرە هەوار ڤێ شێرەژنێ عەبایێ خۆ نە ڤەكر دا وێنێ (مەلا مستەفا بارزانی) دیارنەبیت. لێ ب مخابنیڤە ب دلێ خۆیێ وەك كەڤرا ڕەق و ب دەستێن خۆ یێن سۆر ژخوینێ ڤی ئەفسەرێ خوینمێژ و بێ وژدان شێرەژنا «ئامینا» دا بەر گوللەیین دەمانجێ ل، پشتی شەهیدبووی ب چەند رۆژان كەسێ ژ بنەمالا وێ چ ژێ نەدزانی. ل رێكەفتی ١٩٦١/١١/٢٢ جانێ وێ یێ پاك بلندبوو ئاسمانێ ئازادیێ و گەهشتە كاروانێ شەهیدێن رێكا ئازادیا كوردستانێ، پاشی وێنێ جەنەرال (ملا مستەفا بارزانی) یێ نەمر ژ دەستان دكەڤیت و جامێ وێ دشكێت. ڕژێما فاشست نەهێلا كەس جەنازەیێ وێ ببەت ڤەشێریت و كاك ئەحمەد نەورۆز ئامێدی چەند كەسێن دی ژی دیدەڤانێن ڤێ روویدانێنە و نوكە ژی د ژیانێ دا ماینە. هەر بۆ زانین ئەڤ شێرەژنە خەلكا كوردستانا باكوورە ژ عەشیرەتا (پنیانش) گوندێ (كۆڕسنییا میر قاسم) دەڤەرا (باشكالا) ل وانێ .نوكە ژی كچا وێ عەیشا یا ساخە ل دەڤەرا ئامێدیێ ئاكنجییە. شێرەژنا كورد» ئامیناعەبدولا» ئامێدی ئێكەم شەهیدا ژنە ل شۆرشا ئیلۆنا مەزن ل كوردستانێ و خەباتا كری و جانێ خۆ یێ بەخشی پێخەمەت ئازادیا كوردستانێ. پێدڤییە بۆ ڤێ شێرەژنێ وەك رێزگڕتن ل جورئەت و خەبات و خوینا وێ یا پێشكێشی وەلاتێ خۆ كری هێمایەك یان ژی پەیكەرەك یان كوڕتە فلمەك بۆ بهێتە دروستكرن و ناڤێ وێ لسەر بێتە تۆماركرن. هەروەسا ژ هەژیە ناڤێ ئەڤێ شێرەژنێ و چەندین شێرەژنێن دی یێن كوڕد ل سەر دیرۆكێ ب زێری بهێنە نڤێسین دا بۆ نفشێ نوی ببیت پێشرەو و دیار ببیت كو ب ساناهی ئەم نەگەهشتینە ئەڤێ قووناغا نوكە یا ئەم ب ئازادی و ئارامی تێدا دژین. سەرێ رێز و نەوزاشێ بۆ گیانێ پاكێ شەهیدان دچەمینین، گیانێ شەهیدان ل بەهەشتا بەرین شادببیت ل سەر كاروانێ وان بارزانیێ نەمر و ئیدریسێ هەردەم ساخ، سەرشوڕی و شەرمزاری بو دوژمنێن مرۆڤایەتیێ بیت، بژیت كوڕد و بژیت رێباز.
مفا ژ پێزانینێن نەڤیێ شێرەژنێ مامۆستا (مشیر ڕەزیكی) هاتییە وەرگرتن.
