ئێك سالیا شه‌هیدەکێ ب ڤه‌كرنا پێشانگه‌هه‌كێ هاته ساخكرن
ئه‌ڤرۆنیوز،ره‌مه‌زان هه‌رنى:
ئه‌ڤرۆ ئێڤاری د رێوره‌سمه‌كێ دا ب به‌رهه‌ڤبوونا مالباتا شه‌هیدى و به‌رپرسێن سیاسى و حكومى یێن ده‌ڤه‌رێ ل گۆرستانا ئاكرێ ئێك سالیا شه‌هید رائید پێشكه‌فت زوهێر خالد ل ژێر ناڤێ (سه‌رخوەبوون به‌رهه‌مێ خوینا شه‌هیدایه) ب ڤه‌كرنا پێشانگه‌هه‌كا وێنه‌یێن شه‌هیدى و چه‌ند چالاكیێن دى هاته ساخكرن.
كاوه زوهێر رێكخه‌رێ رێوره‌سمی و برایێ شه‌هید پێشكه‌فت بۆ ئه‌ڤرۆ نیۆز دیاكر،ب بورینا ساله‌كێ ل سه‌ر شه‌هید بوونا رائید پێشكه‌فتی مه وه‌ك مالباتا شه‌هیدى كار لسه‌ر وێ چه‌ندێ كر كو پێشانگه‌هه‌كا وێنه‌یێن شه‌هیدى ل سه‌ر گوێ شه‌هیدى نیشان بده‌ین و ب ده‌نگه‌كێ بلند بێژینه هه‌میان به‌لێ بۆ رێفراندومێ و به‌لێ بۆ ده‌وله‌تا كوردى كو (سه‌رخوەبوون به‌رهه‌مێ خوینا شه‌هیدایه).
كاوه زوهێر خویاكر ژی، د پیێشانگه‌هێ دا هژماره‌كا وێنه‌یێن شه‌هیدى هاتنه نیشاندان هه‌روه‌سا هژماره‌كا كه‌ڤالان كو نیشان دانا مورالا بلندا پێشمه‌رگه‌ى ل سه‌ر دیاربوو هاتنه نیشاندان،هه‌روه‌سا په‌یڤا بنه‌مالا شه‌هیدى و به‌رپرسێ لقێ 9 یێ پارتى دیموكراتى كوردستان و قایمقامیا قه‌زا ئاكرێ هاتنه خواندن و هه‌میان پشته‌ڤانیا خوه بۆ رێفراندومێ و سه‌رخوبونا كوردستانێ دیار كر.
شه‌هید رائید(پێشكه‌فت زۆهێر خالد) به‌رپرسێ كه‌تیبا ئه‌ندازه‌یا سه‌ربازى بوو ل میحوه‌رێ خازر ل رۆژا 9/8/2016 ل گوندێ توله‌به‌ند ل میحوه‌رێ خازر ب بومبه‌كا چه‌كدارێن داعش هاتیه شه‌هیدكرن.
