ئێکانە دەرگەهـ
شیان مەهدی کانیسارکی
دەمێ تو چووی
ئێدی شەڤ ب تنێ نەمان ڕەش
ڕۆژان ژی ملێ خوە دا دگەل..
ڕەنگ ژی هەمی بوونە ڕەش
عەوران ژی دەست،
ژ بارینێ بەردان
چاڤان کورسیک گرتە دەست،
ئەو خەیالێن مێشکێ من
داگیرکری
ئێدی بوونە ڕاستی
ڕاستییەکا هند یا تەحل
کو شرینییا دنیایێ
هەمی نەشێت
تاوا وێ شرین بکەت.
ئێدی ئەز،
تووڕەبوونا خوە
گازندەیێن خوە
گۆمانێن خوە
ترس و برسا خوە
بۆ کێ بێژم؟
ئێدی…هەمی هەبوونا من
«بێ بەرامبەر»ژی هەر یا گرانە و کەسێ نەڤێت
چ جاران وەکی ڤێ نیڤشەڤێ
مرن ل بەر دلێ من
شرین نەبوویە،
چونکی دزانم ئەو
ئێکانە دەرگەهە…
ژ بۆ من و تە… مایە ڤەکری…
هیڤیدارم وی ژی ل پشت خوە
نەگرە و چاڤەڕێی نەخریێ خوە بە..
