ئەحمەد سەبری: دڤێت یانەیێن هەرێمێ یاریزانێن كورد ژ دەستێ خوە نەكەن
شاهۆ فەرید:
د دیدارەكێ دا یاریزانێ تیما فوتبۆلا یانەیا نەفت یا بەغدایی و كورێ باژێرێ سێمێلێ ئەحمەد سەبری بۆ رۆژنامەیا ئەڤرۆ گۆت: پێشبینی دكەم سال بۆ سال خولا ئیراقێ بەر ب پێشڤەچوونێ بچیت، گوهۆڕینێن باش دهێنەكرن تنێ كێشە د كێماسییا یاریگەهان دایە، پتریا یانەیان بێ یاریگەهن كو چار یانە ل سەر ئێك یاریگەه یاریێن خوە ئەنجامدەن. هەروەسان ناڤهاتی گۆت: ئەڤی وەرزی ئەم دو یاریزانێن كورد خەلكێ هەرێمێ دناڤ پێكهاتیێ یانەیا نەفت داینە ئەز و دیار یاخی، كارگێرێن یانەیێن خوارێ هەردەم پشتەڤانێن یاریزانانە بێ جوداهی، راهێنەر ژی هەنە ب یاریزانێ كورد پێخوەشحالن، وەرزێ بوری راهێنەرێ تیمێ ژ ئاستێ من رازی نەبوو لێ پشتی من خوە پێشئێخستی ئەڤ سالە رازیە و شیایمە چەند گۆلێن كاریگەر بۆ تیما خوە بینم.
هەروەسان ئەحمەد سەبری گۆت: ئاستێ یاریزانێ كورد ژ یێ پێشەكاران كێمتر نینە لێ یانەیێن كوردی وی چاڤی بەرێ خوە نادەنێ پتر حەز پێشەكار و عەرەبان دكەن، لژنەیێن یانەیان چاڤەكێ كێم بەرێ خوە دەنەێن یاریزانێ كورد، دێ چن یاریزانەكێ ئینن هەمان ئاستێ یێ كورد و پارەكێ گرانتر، یانەیێن هەرێمێ دڤێت یاریزانێن كورد ژ دەستێ خوە نەكەن.
