ئەردۆغانی دڤێت ژ بۆ چارەسەرکرنا پرسا کوردی هندەک کاران بکەت
سیاسەتمەدارەکێ تورکیا دیار کر، هەلوەستێ نها یێ دەولەتا تورکیا سەبارەت ب چارەسەرکرنا پرسا کوردی گەلەک گرنگە، سەرۆک کۆمارێ تورکیا دێ د دەمەکێ نێزیک دا ژ بۆ چارەسەرکرنا پرسا کوردی هندەک تشتان کەت.
ئوفووک ئوراس ئەندامێ بەرێ یێ پەرلەمانێ تورکیا دیار کر، وی بەری چەند رۆژان سەرەدانا دەولەت باخچەلی سەرۆکێ پارتا بزاڤا نەتەوەپەرست یا تورکیا کریە و سەبارەت ب دەستپێکرنا قۆناغەکا نوو و چارەسەرکرنا پرسا کوردی دانوستاندن کرینە و گۆت: (دەولەت باخچەلی ل سەر ڤێ باوەریێ یە کو دڤێت چو ناکۆکی د ناڤبەرا کورد و تورکان دا نەمینن، ل گۆر باوەریا باخچەلی پێدڤیا تورکیا ب ئاشتیێ هەیە، ئەو دبێژیت ب شەڕی چو پرسەک ناهێتە چارەسەرکرن و دڤێت پەکەکە ژی ب تەمامی دەست ژ چەکی بەردەت).
سیاسەتمەدارێ تورکیا ئەو یەک ژی دیار کر، تورکیا هەست ب گوهۆڕینێن مەزن ل دەڤەرێ کریە، بێگومان نها پیلانێن مەزن ژی ل دۆر پاشەرۆژا دەڤەرێ هەنە، هەر وەلاتەکێ ژی دڤێت پێگەهێ خوە بهێز بکەت، لێ مخابن رەوشا تورکیا گەلەک یا جودایە، چونکی پرسا کوردی ل تورکیا هەتا نها نەهاتیە چارەسەرکرن، ل ئالیێ دی نها تورکیا د قەیرانەکا گەلەک مەزن یا ئابووری دایە، پێدڤیا تورکیا ب ئاشتیێ هەیە و هەر کەس ژی دزانیت هەتا پرسا کوردی ل تورکیا نەهێتە چارەسەرکرن کەس نەشێت بەحسێ ئاشتیێ بکەت و گۆت: (دەولەت باخچەلی ب سالان ل دژی پرسا کوردی بوو، نها ژی هندەک جاران دبێژیت پرسا کوردی نینە، لێ ب گشتی هەلوەستێ ڤێ دووماهیێ یێ باخچەلی گەلەک گرنگە، دڤێت هەم ئالیێ کوردی و هەم ژی دەولەتا تورکیا مفایێ ژ هەلوەستێ نها یێ باخچەلی وەربگرن، چونکی نها زەمینەکا گەلەک باش بۆ ئاشتیێ هەیە و دڤێت ئەم نەهێلین جارەکا دی ئەڤ دەلیڤە ژ دەست بچیت).
ناڤهاتی ئەو یەک ژی دیار کر، بێگومان دەولەت باخچەلێ بێی هەماهەنگی ل گەل ئەردۆغانی چو کارەکێ ناکەت، هەموو داخۆیانی و ئاخڤتنێن وی ب دلێ ئەردۆغانی نە، ئەو یەک ژی نیشا ددەت د ئاستەکێ بلند دا ل تورکیا کار بۆ دەستپێکرنا قۆناغەکا نوو دهێتە کرن و گۆت: (ل گۆر زانیاریێن گەهشتینە من نها ئەردۆغان ژی بەرهەڤیان دکەت و دێ د دەمەکێ نێزیک دا ژ بۆ چارەسەرکرنا پرسا کوردی ل تورکیا ب کریاری هندەک تشت هێنە کرن، ئەو یەک ژی دشێت باوەریەکا گەلەک مەزن د ناڤبەرا کورد و تورکیا دا دروست بکەت، ئەم دزانین جڤاکێ تورکیا ئاشتی دڤێت، نها ل تورکیا کەس ل دژی ئاشتیێ و چارەسەرکرنا پرسا کوردی نینە، یێن هەتا نها دژبەریا کوردان دکرن ئەو ژی نها دبێژن دڤێت پرسا کوردی بهێتە چارەسەرکرن، ئەو یەک ژی گەلەک گرنگە).
