ئەردۆغان دێ سیاسەتا خوە ل هەمبەر سووریێ گوهۆڕیت
ئەڤرۆ
ڤەکۆلەرەکێ ناڤدار یێ تورکیا راگەهاند، سەرکەفتنا ئەردۆغانی د هەلبژارتنان دا دێ بیتە ئەگەرێ روودانا گەلەک گوهۆڕینان ل دەڤەرێ، ب تایبەتی ژی تورکیا دێ سیاسەتا خوە ل هەمبەر سووریێ گوهۆڕیت، گەلەک فاکتەرێن گرنگ هەنە کو وەسا دکەن ئەردۆغان نەچار بیت ل گەل رژێما سووریێ دەست ب قۆناغەکا نوو بکەت.
فەهیم تاشتەکین ڤەکۆلەرێ ناڤدار یێ تورکیا راگەهاند، بەری نها بەشار ئەسەد رازی نەبوو ل گەل ئەردۆغانی دەست ب قۆناغەکا نوو بکەت، چونکی بەشار چاڤەرێی ئەنجامێن هەلبژارتنێن تورکیا بوو، نها هەلبژارتن هاتنە کرن و ئەردۆغان جارەکا دی وەکو سەرۆک کۆمارێ تورکیا سەرکەفتنا خوە راگەهاند، رەوشەکا نوو هاتیە پێش، تورکیا دڤێت پەیوەندیێن خوە ل گەل رۆسیا باشتر بکەت، ئێدی گەلەک یا ب زەحمەتە تورکیا بەرێ خوە بدەتە رۆژئاڤا، ژ بەر هندێ ژی هندەک کارێن گەلەک گرنگ هەنە، کو ئەردۆغانی دڤێت د دەمێ 5 سالێن بهێت دا وان بکەت و گۆت: (بێگومان خالا هەری گرنگ ژی بابەتێ سووریێ یە، ئەردۆغان و بەرپرسێن دی یێن تورکیا سۆز داینە دێ رێژەکا مەزن ژ پەنابەرێن سووریێ بۆ وەلاتێ وان ڤەگەرینن، چونکی نها پەنابەرێن سووریێ بۆ تورکیا بووینە بارگرانی و خەلکێ تورکیا ژی ئێدی ناخوازن پەنابەرێن سووریێ ل وەلاتێ وان بمینن، د دەمێ پرۆپگاندا هەلبژارتنان دا ژی هەم ئەردۆغان و هەم ژی بەرپرسێن دی یێن ئاکپارتیێ دیار کرن ئەو دێ د قۆناغا ئێکێ دا پتر ژ ملیۆنەکێ پەنابەرێن سووریێ رەوانەی وەلاتێ وان کەن).
ڤەکۆلەرێ ناڤدار یێ تورکیا ئەو یەک ژی دیار کریە، پشتی هەلبژارتنێن تورکیا بێگومان بۆ بەشار ئەسەدی ژی دیار بوویە دڤێت ل گەل ئەردۆغانی دەست ب قۆناغەکا نوو بکەت، سووریێ چەندین داخوازیێن سەرەکی هەبوون، ژ وان ژی دڤێت تورکیا هەموو هێزێن خوە ژ ئاخا سووریێ ڤەکێشیت و دەست ژ پشتەڤانیا گرۆپێن چەکدار بەردەت، تورکیا ژی هەردەم دیار کریە ئەو بەرهەڤن بێی مەرج ل گەل شامێ دەست ب دانوستاندنان بکەن، بێگومان هەر دانوستاندنەک د ناڤبەرا تورکیا و سووریێ دا دەستپێ بکەت دێ کاریگەریا خوە ل پاشەرۆژا کوردێن سورویێ ژی کەت.
ناڤهاتی ئەو یەک ژی دیار کریە، تورکیا ب چو رەنگەکێ رازی نینە کوردێن سووریێ ئانکۆ پەیەدە و هێزێن سووریا دیموکرات ل سووریێ بهێز کەڤن، تورکیا ل دژی ئاڤاکرنا هەرێمەکا کوردی یە بۆ کوردێن سووریێ، ژ بەر هندێ ژی تورکیا بەری نها گەلەک جاران دیار کریە ئەو بەرهەڤن هاریکاریا شامێ بکەن دا دووماهیێ ب دەستهەلاتا هێزێن سووریا دیموکرات ل هندەک دەڤەرێن باکورێ سووریێ بینیت، لێ رۆسیا و شام هەتا نها رازی نەبووینە تشتەک وەسا بهێتە کرن، چونکی رۆسیا نەڤێت چو شەرێن نوو ل سووریێ روو بدەن و خالا دی شام ژی د رەوشەکا وەسا دا نینە کو بڤێت شەڕێ کوردان بکەت، چونکی ئەو یەک دێ بیتە ئەگەرێ هندێ رەوشا ناڤخوەیی یا سووریێ ژی گەلەک ئالۆز بیت.
فەهیم تاشتەکین د دووماهیا ئاخڤتنا خوە دا ئەو یەک ژی دیار کریە، هەکە تورکیا و سووریێ دەست ب قۆناغەکا نوو بکەن و پەیوەندیێن خوە ئاسایی بکەن ئەو یەک د بەرژەوەندیا کوردان دا نابیت، هەرچەندە بەری نها گەلەک جاران بەرپرسێن رۆسیا دیار کرینە، دڤێت کورد ل سووریێ بگەهنە مافێن خوە، چونکی هەتا کورد نەگەهنە مافێن خوە دێ ئالۆزیێن ل سووریێ ژی هەر بەردەوام بن، لێ ئەو یەک رامانا هندێ نادەت دێ مۆسکۆ پشتەڤانیێ ل مافێن کوردان کەت، ل ئالیێ دی ژ بەر شەڕێ نها ل ئۆکرانیایێ رۆسیا ژی تا رادەیەکێ پێدڤی تورکیا یە، ل ئالیێ دی ئیران ژی نها رۆلەکێ گەلەک خراب ل سووریێ دگێریت و گۆت: ( ئیرانێ دڤێت ب رێیا گرۆپێن چەکدار ل باکورێ سووریێ ئێرشی هێزێن ئەمریکا بکەت، ئیرانێ دڤێت ئەمریکا تەنگاڤ بکەت دا نەچار بیت هەموو هێزێن خوە ژ ئاخا سووریێ ڤەکێشیت، بێگومان ئەو یەک دێ وەسا کەت دا سووریا، ئیران و تورکیا پێکڤە دەست ب پیلانەکا نوو ل دژی کوردان بکەن، د رەوشەکا وەسا دا هەکە ئەمریکا ب توندی بەرسڤا ئێرشێن ئیرانێ نەدەت و هێزێن خوە ڤەکێشیت دێ کوردێن سووریێ تووشی زیانێن مەزن بن).
ل ئالیێ دی بەری چەند رۆژان رۆژناما واشنتۆن پۆست یا ئەمریکی ژی د راپۆرتەکێ دا دیار کر، ئیرانێ دڤێت ب رێیا گرۆپێن چەکدار ئێرشی هێزێن وان ل سووریێ بکەت، ژ بۆ هندێ ژی فەرماندارەکێ لەشکرێ قودس یێ سەر ب سوپایێ پاسداران بەری دو حەفتیان سەرەدانا شامێ کریە و ل گەل فەرماندارێن گرۆپێن چەکدار کۆمبوویە و بەحسێ پلانێن نوو یێن ئیرانێ ل سووریێ کریە و داخواز ژ وان کریە خوە بۆ شەڕەکێ مەزن ل دژی هێزێن ئەمریکا بەرهەڤ بکەن.
