ئەردۆغان سەبارەت ب روودانێن ڤێ دووماهیێ هۆشداریێ ددەتە پارتا دەم
سەرۆک کۆمارێ تورکیا راگەهاند، هندەک ژ سەرۆکێن باژێرڤانیێن پارتا دەم قانوونێن هەی بنپێ دکەن و سڤکاتیێ ب بهایێن تورکیا دکەن، ئەم ل هەمبەر کارێ وان بنێدەنگ نامینین و وەزارەتا ناڤخوە یا تورکیا دێ یا پێدڤی ل هەمبەر وان کەت.
رەجەب تەیب ئەردۆغانێ سەرۆک کۆمارێ تورکیا دوهی راگەهاند، هندەک ژ سەرۆکێن باژێرڤانیێن پارتا دەم سڤکاتیێ ب ئەتاتورکی و بهایێ تورکیا دکەن، بەری نها ژی کارێن وەسا هاتنە کرن، هەر زوو قەیوم ل جهێ وان کەسان هاتە دانان، نها ژی ئەم دێ یا پێدڤی ل دژی وان کەسان کەین و رێ نادەین ل ژێر ئالایێ تورکیا سڤکاتی ب بهایێن کۆمارا تورکیا بهێتە کرن و گۆت: (ل ژێر ناڤێ ئازادیێ و دیموکراسیێ کەس نەشێت سڤکاتیێ ب بهایێن کۆمارا تورکیا بکەت، هندەک تشت ل تورکیا هێلێن سۆرن، ئەم رێ نادەین چو هێزەکا سیاسی سڤکاتیێ ب بهایێن خەلکێ مە بکەت، روودانێن بەری چەند رۆژان ل باژێرڤانیا سور یا ئامەدێ ژی نیشا ددەت هێشتا ئەو راستیا هەی قەبوول ناکەن و ئاریشان دروست دکەن، وەزارەتا ناڤخوە یا تورکیا دەست ب پێرابوونێن پێدڤی کریە و دێ یا پێدڤی ل دژی وان کەسان هێتە کرن).
چاڤدێرێن سیاسی ل تورکیا ژی دیار دکەن، داخۆیانیێن ئەردۆغانی ئاماژەنە بۆ ڤێ یەکێ دێ جارەکا دی ب بەهانا پشتەڤانی ل رێکخستنا پەکەکێ هندەک ژ سەرۆکێن باژێرڤانیان ل باژێرێن کوردی ژ کارێ وان هێنە دوورخستن و دێ ب جهێ وان جارەکا دی قەیوم هێنە دانان، چونکی بەری نها ژی ئەو یەک هاتیە کرن، حوکمەتا نها یا تورکیا دبێژیت بەری نها هەدەپە و نها ژی پارتا دەم دخوازن باژێرڤانیان بکەنە د خزمەتا رێکخستنا پەکەکێ دا، ئەو یەک ژی ب چو رەنگەکێ ژ ئالیێ تورکیا ڤە ناهێتە قەبوول کرن، ژ بەر ڤێ یەکێ ژی دهێتە چاڤەرێکرن د چەند رۆژێن بهێت دا هژمارەک ژ سەرۆکێن باژێرڤانیێن باژێرێن کوردی ل باکورێ کوردستانێ ژ کارێ وان بهێنە دوورخستن و جارەکا دی قەیوم هێنە دانان.
ل ئالیێ دی حسێن چەلیک ئێک ژ دامەزرێنەرێن ئاکپارتیێ و وەزیرێ بەرێ یێ حوکمەتا تورکیا راگەهاند، ئاکپارتی شاشیێن گەلەک مەزن کرن، رێککەفتنا ئاکپارتیێ ل گەل پارتا بزاڤا نەتەوەپەرست وەسا کر، کورد خوە ژ ئاکپارتیێ دوور بکەن، بەری نها رێژەیەکا گەلەک مەزن ژ کوردان ل تورکیا دەنگێ خوە ددانە ئاکپارتیێ، لێ نها رەوش ب تەمامی هاتیە گوهۆڕین و رۆژ ب رۆژێ کورد پتر خوە ژ ئاکپارتیێ دوور دکەن، دڤێت ئاکپارتی دووماهیێ ب رێککەفتنا خوە ل یا ل گەل پارتا بزاڤا نەتەوەپەرست بینیت و جارەکا دی بەرێ خوە بدەتە کوردان، چونکی بێی پشتەڤانیا کوردان ئاکپارتی ل تورکیا یا سەرکەفتی نابیت.
ئەو یەک د دەمەکێ دایە کو بەری سێ رۆژان دەولەت باخچەلی سەرۆکێ پارتا بزاڤا نەتەوەپەرست یا تورکیا ژی راگەهاند، پارتا دەم بوویە ئاریشەکا گەلەک مەزن بۆ پاشەرۆژا تورکیا، پارتا دەم مەترسیە ل سەر تورکیا و بەرپرسێن وێ پارتیێ ل ژێر ناڤێ ئازادی و دیموکراسیێ کار بۆ پارچەکرنا تورکیا دکەن، ژ بەر ڤێ یەکێ ژی دڤێت هەر زوو پارتا دەم بهێتە داخستن، چونکی نابیت هێزەکا سیاسی ل تورکیا پشتەڤانیێ ل رێکخستنەکا تیرۆرست بکەت و کار بۆ پارچەکرنا تورکیا بکەت، ئەو یەک ژی مەترسیەکا گەلەک مەزنە و دڤێت هەر زوو کار بۆ داخستنا پارتا دەم ل تورکیا بهێتە کرن.
