ئەردۆغان وەکو پێدڤی پشتەڤانیێ ل قووناغا ئاشتیێ ناکەت
بسپۆرەکێ کاروبارێن سیاسی دیار دکەت، نها دەولەت باخچەلی و بەرپرسێن دەم پارتی یا پێدڤی ژ بۆ پێشڤەبرنا قووناغا ئاشتیێ دکەن، لێ هەلوەستێ ئەردۆغانی گەلەک لاوازە و دیارە ئەردۆغان هێشتا ژی ل گۆر بەرژەوەندیێن پارتا خوە سەرەدەریێ ل گەل قووناغا ئاشتیێ دکەت.
مومتازەر تورکۆنە بسپۆرێ کاروبارێن سیاسی راگەهاند، قووناغا ئاشتیێ هەتا نها ب رەنگەکێ باش بەردەوام دکەت و پێکئینانا کۆمسیۆنا ئاشتیێ ل پەرلەمانێ تورکیا ژی پێنگاڤەک گەلەک گرنگ بوو و گۆت: (یا راست هەتا نها دو هێز ب دل و جان ژ بۆ سەرکەفتنا قووناغا ئاشتیێ کار دکەن، ئەو ژی مەهەپە و سەرۆکێ وێ باخچەلی و ل ئالیێ دی ژی دەم پارتی، لێ هەلوەستێ ئەردۆغانی و پارتا وی گەلەک لاوازە، دیارە ئەردۆغان ل گۆر بەرژەوەندیێن پارتا خوە سەرەدەریێ ل گەل قووناغا ئاشتیێ دکەت، ئەو یەک د دەمەکێ دایە کو پێدڤیە ئەردۆغان خوە وەکو خوەدانێ قووناغا ئاشتیێ ببینیت و ب دل و جان ژی ژ بۆ سەرکەفتنا وێ کار بکەت، لێ هەتا نها ئەو یەک ب کریاری دیار نینە).
ناڤهاتی راگەهاند، ئەردۆغان ژ نێزیکڤە دووڤچوونا ئەنجامێن راپرسیان دکەت، هەکە ژ بۆ وی دیار بیت دێ ژ بەر قووناغا ئاشتیێ رێژەیا دەنگێن ئاکپارتیێ زێدەتر لێ هێن دبیت پاشی هەلوەستێ ئەردۆغانی بهێتە گوهۆڕین و هەکە دیت کێمتر لێ دهێن دبیت چو نەکەت و ئەو یەک ژی بێگومان دێ کاریگەریا خوە یا خراب ل سەر پاشەرۆژا تورکیا هەبیت، چونکی نها د ناڤ جڤاکێ تورکیا دا پشتەڤانیەکا گەلەک باش ژ بۆ ئاشتیێ هەیە و نابیت چو هێزەکا سیاسی ژ بەر بەرژەوەندیێن خوە یێن تەنگ یاریێ ب چارەنڤیسێ گەلێ تورکیا بکەت و گۆت: (دڤێت ئەردۆغان دەست ژ سیاسەتا خوە یا نها بەردەت و ب هەموو هێزا خوە سەرکێشیا قووناغا ئاشتیێ کەت، ئەو یەک دەلیڤەیەکا گەلەک گرنگە بۆ هەموو تورکیا و نابیت ئەردۆغان ژ بۆ بەرژەوەندیێن خوە یێن تەنگ سەرەدەریەکا جودا بکەت، ئەو یەک ژ ئالیێ خەلکێ تورکیا ڤە ب چو رەنگەکێ ناهێتە قەبوول کرن).
سەبارەت ب رەوشا سووریێ و هەلوەستێ تورکیا ژی بسپۆرێ کاروبارێن سیاسی دیار کر، هەلوەستێ نها یێ تورکیا ل دۆر کوردێن سووریێ گەلەک شاشە، هەر کەس دزانیت نها ل سووریێ رەوش گەلەک خرابە، ل ئالیێ دی پەیوەندیێن شامێ و کوردان ژی باش نینن، شام نەشێت ب زۆرێ کوردان نەچار بکەت وەکو بەرێ بژین و بێی ماف بن، کوردان د شەڕێ ل دژی داعشێ دا گەلەک قوربانی داینە و نها هەرێمەکا مەزن بۆ خوە ئاڤا کرینە، ئەمریکا و وەلاتێن رۆژئاڤایی ژی پشتەڤانیێ ل کوردان دکەن، ئانکو مرۆڤ دشێت بێژیت نها د ئاستێ نێڤدەولەتی دا پشتەڤانیەک باش ژ بۆ کوردێن سووریێ هەیە و گۆت: (شام نەشێت بێی رازیبوونا ئەمریکا ئێرشی رۆژئاڤایێ کوردستانێ بکەت، ل ئالیێ دی ئیسرائیل ژی ب چو رەنگەکێ رێ نادەت دەستهەلاتەکا ناڤەندی و بهێز ل سووریێ هەبیت، دڤێت ژبیر نەکەین ل سووریێ دورزی ژی هەنە و ئسرائیل ب هەموو رەنگەکێ پشتەڤانیێ ل وان دکەت، ئانکو ب کورتی نە ئەمریکا و نە ژی ئسرائیل رێ نادەن شام ئێرشی کوردان بکەت، دەمێ ئەم ڤان خالان هەموویێ بدەینە بەرچاڤ وی دەمی دڤێت تورکیا راستیا هەی قەبوول بکەت و سیاسەتا خوە ل هەمبەر کوردێن سووریێ بگوهۆڕیت).
ناڤهاتی ئەو یەک ژی دیار کر، تورکیا دشێت پەیوەندیێن باش ل گەل کوردێن سووریێ دروست بکەت، هەکە تورکیا کارەک وەسا بکەت ئەو یەک دێ بیتە ئەگەرێ بهێزبوونا پێگەهێ تورکیا ل سووریێ، دڤێت ژبیر نەکەین هەتا نها ژی هێزێن جیهانی ب گومانڤە بەرێ خوە ددەنە ئەحمەد شەرعی و کریارێن وان یێن ل سوەیدا سەلماند هێشتا ژی سووریێ چو لەشکر نینن و ژ هندەک گرۆپێن توندرەو پێکهاتیە و ئەو گرۆپێن توندرەو دشێن سوباهی بۆ تورکیا ژی ببنە ئاریشە، ژ بەر ڤێ یەکێ ژی دڤێت تورکیا پەیوەندیێن خوە ل گەل رێڤەبەریا خوەسەر و هەسەدێ باش بکەت و گۆت: (د دەمێن بۆری دا بەرپرسێن هەسەدێ و رێڤەبەریا خوەسەر چەندین جاران دیار کرن وان دڤێت پەیوەندیێن خوە ل گەل تورکیا باش بکەن، ئانکو مرۆڤ دشێت بێژیت نها تورکیا ب سیاسەتەکا راست دشێت گەلەک کارێن باش ل سووریێ بکەت، لێ سیاسەتا نها دێ بیتە ئەگەرێ ئالۆزیێن گەلەک مەزن و ئەو یەک دێ بیتە ئەگەرێ روودانا ناکۆکیێن گەلەک مەزن د ناڤبەرا کوردێن سووریێ و دەولەتا تورکیا دا).
مومتازەر تورکۆنە د دووماهیا ئاخڤتنا خوە دا ئەو یەک ژی دیار کر، دڤێت بەرپرسێن تورکیا ڤێ یەکێ باش بزانن هەکە پشتەڤانیێ ل ئێرشەکا سەربازی یا شامێ ل دژی کوردێن سووریێ بکەن، ئەو یەک دێ بیتە ئەگەرێ ژناڤچوونا قووناغا ئاشتیێ ل تورکیا و دێ زیانێن گەلەک مەزن ژی گەهنە تورکیا، ژ بەر ڤێ یەکێ گرنگە ئەردۆغان وەکو کەسێ ئێکێ یێ دەستهەلاتدار حسابا هەموو تشتەکێ بکەت و باش بزانیت کورد ل سووریێ بێ خوەدان نینن و پشتەڤانیەکا باش بۆ وان هەیە و هەسەدە ژی نها هێزەکا مەزن و کاریگەرە و ب کورتی دڤێت هەر کەس ڤێ یەکێ قەبوول بکەت کو کورد ئیرادەیا خوە رادەستی شامێ و چو ئالیان ناکەن.
