ئەردۆغان و کلچدار ئوغلۆ کار بۆ بدەستڤەئینانا دەنگێن کوردان دکەن
ئەڤرۆ
دەزگەهێن راگەهاندنا تورکیا دیار دکەن، دەنگێن کوردان دێ چارەنڤیسێ هەلبژارتنا سەرۆک کۆماریێ ل تورکیا ئێکلا کەت، ژ بەر هندێ ژی هەر دو بەربژارێن بهێز ئانکۆ رەجەب تەیب ئەردۆغان و کەمال کلچدار ئوغلۆ نها ب هەموو رەنگەکێ خۆ بەرهەڤ دکەن دا بشێن دەنگێن کوردان بدەستڤە بینن.
رۆژناما حوڕییەت یا تورکیا د راپۆرتەکێ دا ئاماژە ب هندێ کریە، بریارا هەدەپێ د بەرژەوەندیا ئەردۆغانی دا نینە، چونکی ئاکپارتیێ پێ باش بوو هەدەپێ ژی بەربژارێ خۆ هەبیت، هەکە هەدەپێ بەربژارەک بۆ سەرۆک کۆماریا تورکیا هەبا دا ئەو یەک بیتە ئەگەرێ پارچەبوونا دەنگان و بێگومان د بەرژەوەندیا ئەردۆغانی دا بوو، لێ نها تشتەک وەسا نینە و پڕانیا دەنگێن کوردان دێ بۆ کلچدار ئوغلۆی بن و ئەو یەک دشێت ببیتە ئەگەرێ شکەستنا ئەردۆغانی.
رۆژناما مللیەت ژی دیار کریە، د هەلبژارتنێن هەری دویماهیێ یێن باژێرڤانیان دا ل چەندین باژێرێن مەزن یێن تورکیا، ژ بەر دەنگێن کوردان ئاکپارتی تووشی شکەشتنێ بوو، نها ئەردۆغان گەلەک دترسیت هەمان سیناریۆ بهێتە دوبارەکرن، لێ ئۆپۆزسیۆنا تورکیا ژی ب هەموو رەنگەکێ کار دکەت دا ب پشتەڤانیا کوردان و ئاکپارتیێ ژ دەستهەلاتێ دویر بکەت.
