ئەردۆغان ژ بۆ رازیکرنا شامێ داخوازەکا نوو ژ بەشار ئەسەدی دکەت
رۆژنامەڤانەکا تورکیا دیار دکەت رەجەب تەیب ئەردۆغانێ سەرۆک کۆمارێ تورکیا داخواز ژ بەشار ئەسەد کریە کو پێکڤە دەست ب ئۆپەراسیۆنەکا سەربازی ل دژی رۆژئاڤایێ کوردستانێ دکەن و رێڤەبەریا خوەسەر ژناڤ ببەن و پاشی ژی تورکیا دێ هەموو هێزێن خوە ژ ئاخا سووریێ ڤەکێشیت.
هەدیە لەڤەنت رۆژنامەڤانا تورکیا د داخۆیانیەکێ دا راگەهاند، دەمەکە تورکیا دەست ب بزاڤەکا مەزن یا کری و دڤێت ب هەر رەنگێ هەی ل گەل شامێ دەست ب قۆناغەکا نوو بکەت، چونکی رەوشا نها د بەرژەوەندیا تورکیا دا نینە، تورکیا گەلەک ژ ڤێ یەکێ دلگرانە کو ل باکورێ سووریێ هەلبژارتن بهێنە کرن، چونکی وی دەمی دێ دەستهەلاتەکا رەوا ب دەنگێ خەلکی هێتە سەر کاری و یەک ب چو رەنگەکێ د بەرژەوەندیا تورکیا دا نینە، ژ بەر ڤێ یەکێ ژی نها تورکیا دڤێت ل دژی رێڤەبەریا خوەسەر ب هاریکاریا شامێ دەست ب بزاڤەکا نوو بکەت.
هەمان رۆژنامەڤانێ ئەو یەک ژی دیار کریە، بەری نها گەلەک جاران ئەردۆغانی داخواز ژ بەشار ئەسەدی کریە کو پێکڤە دەست ب قۆناغەکا نوو بکەن، لێ ئەو یەک ژ ئالیێ شامێ ڤە ب توندی هاتیە رەتکرن، ژ بەر ڤێ یەکێ ژی تورکیا ب رێیا کەنالێن خوە یێن تایبەت پێشنیازەکا نوو دایە شامێ و چاڤەرێی بەرسڤا حوکمەتا سووریێ یە و گۆت: (د پێشنیازا نوو یا تورکیا دا هاتیە، ئەو وەکو تورکیا بەرهەڤن هەموو هێزێن خوە ژ باکورێ سووریێ ڤەکێشن، لێ دڤێت بەری وێ شام بەرهەڤ بیت دا ئەو پێکڤە ئێرشی باکورێ سووریێ بکەن و رێڤەبەریا خوەسەر ژناڤ ببەن، هەکە رێڤەبەریا خوەسەر ژناڤ بچیت و جارەکا دی سووریێ بشێت حوکمێ ل هەموو ئاخا خوە بکەت وی دەمی تورکیا ژی بەرهەڤە هەموو هێزێن خوە ژ ئاخا سووریێ ڤەکێشیت).
ئەو یەک د دەمەکێ دایە کو بەری سێ رۆژان سەرۆک کۆمارێ تورکیا د داخۆیانیەکێ دا راگەهاند، وەکو تورکیا وان دڤێت ل گەل شامێ دەست ب قۆناغەکا نوو بکەن و هەموو پرسێن هەی پێکڤە چارەسەر بکەن، هەکە شام یا بەرهەڤ بیت تورکیا ژی چو ئاریشە نینن کو ل گەل حوکمەتا سووریێ دەست ب دانوستاندنان بکەت.
ل ئالیێ دی دوهی بەرپرسەکێ حوکمەتا سووریێ ژی راگەهاند، دڤێت تورکیا هەموو هێزێن خوە ژ ئاخا سووریێ ڤەکێشیت و دەستان ژ پشتەڤانیا گرۆپێن چەکدار ژی بەردەت، هەکە تورکیا کارەکێ وەسا بکەت ئەو وەکو سووریێ دشێن ل گەل وی وەلاتی دەست ب دانوستاندنان بکەن، لێ نها رەوش بۆ دانوستاندنان گونجای نینە، چونکی تورکیا پشکەک ژ ئاخا سووریێ داگیر کریە و دڤێت بێی مەرج ژ ئاخا سووریێ دەرکەڤیت، هەتا تورکیا داخوازیێن شامێ بجه نەئینیت وەکو سووریێ ئەو ل گەل تورکیا چو دانوستاندنان ناکەن.
