ئەردۆغان: کەس نەشێت ئاستەنگان ل هەمبەر ئاشتیێ دروست بکەت
سەرۆک کۆمارێ تورکیا دیار کر وان دڤێت ب پشکداریا کورد، تورک و هەموو نەتەوەیێن دی یێن ل تورکیا دەست ب قۆناغەکا نوو بکەن و دێ ئاشتیێ ل تورکیا جێگر کەن و کەس نەشێت ئاستەنگیان ل هەمبەر ئاشتیێ دروست بکەت، پێدڤیا تورکیا ب ئاشتی و پێکڤەژیانێ یا هەی.
رەجەب تەیب ئەردۆغانێ سەرۆک کۆمارێ تورکیا راگەهاند، وەکو تورکیا وان دەست ب قۆناغەکا نوو کرینە، ب سالانە کورد، تورک و هەموو نەتەوەیێن دی یێن ل تورکیا پێکڤە دژین، مخابن هندەک هێز بزاڤا ڤێ یەکێ دکەن ئاستەنگیان ل هەمبەر پێکڤەژیانا ل تورکیا دروست بکەن، ئەو یەک ب چو رەنگەکێ ناهێتە قەبوول کرن و گۆت: (دەمەکە د ئاستێ دەرڤە و ناڤخوەیی دا بزاڤ بۆ تێکدانا رەوشا تورکیا دهێتە کرن، ئەم ب چو رەنگەکێ رێ نادەین کارەک وەسا بهێتە کرن، وەکو تورکیا مە دەست ب قۆناغەکا نوو یا کری، هەموو پرسێن هەی دێ د ناڤ خوە دا چارەسەر کەین و رێ نادەین هندەک هێزێن دەرڤە ب بەهانا هندەک پرسان ئالۆزیان دروست بکەن، ئەم ژ بۆ ئاشتی و پێکڤەژیانێ کار دکەین و گەلێ تورکیا ژی پشتەڤانیێ ل مە دکەت، د دەمەکێ وەسا دا کەس نەشێت ئاستەنگیان ل هەمبەر ئاشتیێ و پێکڤەژیانێ ل تورکیا دروست بکەت).
سەرۆک کۆمارێ تورکیا ئەو یەک ژی دیار کر، د ڤێ دەمێ دا کو رەوشا دەڤەرا مە ب گشتی ئالۆزە دڤێت هەموو هێزێن سیاسی، رێکخستنێن جڤاکێ سڤیل، کەسێن ئەکادیمی، هونەرمەند، رۆژنامەڤان، نڤیسەر و هەموو وەلاتیێن تورکیا پشتەڤانیێ ل بزاڤێن مە یێن بۆ ئاشتیێ بکەن، دڤێت ئەم رێ نەدەین ئالۆزیێن نها ل رۆژهەلاتا ناڤین کاریگەریا خوە یا خراب ل سەر تورکیا بکەت، ژ بۆ ڤێ یەکێ ژی دڤێت ئەم هەموو پێکڤە کار بۆ تورکیایەک بهێز بکەین کو تێدا هەموو نەتەوە دشێن د ناڤ ئاشتیێ دا بژین.
ئەردۆغان د پشکەکا دی یا ئاخڤتنا خوە دا بەحسێ ئێرشا ڤێ دووماهیێ یا ئسرائیلێ ل سەر ئیرانێ ژی کر و راگەهاند وەکو تورکیا ئەو ب توندی ئێرشا ئسرائیلێ ل سەر ئیرانێ شەرمزار دکەن، ئسرائیل بزاڤا تێکدانا رەوشا نها ل رۆژهەلاتا ناڤین دکەت، وان دڤێت رەوشا هەی ئالۆزتر لێ بکەن، لێ دڤێت ئەم رێ نەدەین ئسرائیل رەوشا دەڤەرا مە ئالۆز بکەت، دڤێت ئەم پێکڤە ل دژی پیلانێن ئسرائیلێ راوەستین و گۆت: (وەکو تورکیا ئەم ل دژی ئێرشێن ئسرائیلێ نە و دڤێت وەلاتێن دی یێن جیهانێ ژی ئێرشێن ئسرائیلێ ل لوبنانێ و غەزە و ڤێ دووماهیێ ل سەر ئیرانێ ژی ب توندی شەرمزار بکەن، چونکی ئسرائیل تاوانێن مەزن ل دژی مرۆڤاتیێ ئەنجام ددەت و مخابن یێن رۆژانە بەحسێ مافێ مرۆڤی دکەن ل هەمبەر کریارێن ئسرائیلێ د بێدەنگن).
