ئەردۆغـان: چاڤێ مە ل ئاخـا چـو وەلاتەکـێ دی نینە
رەجەب تەیب ئەردۆغانێ سەرۆک کۆمارێ تورکیا راگەهاند، رەوشا نها یا ل سووریێ کاریگەریا خوە ل سەر تورکیا ژی هەیە، وان بەری نها گەلەک جاران هۆشداری دانە بەشاری کو ل گەل تورکیا دەست ب قۆناغەکا نوو بکەت، وەکو تورکیا وان دخواست پرسێن هەی ب رێیا دانوستاندنێ چارەسەر بکەن، لێ بەشاری دەلیڤەیێن هەی ژ دەست دان و نها رەوشەکا نوو ل سووریێ هاتیە پێش و بێگومان دێ گەلەک گوهۆڕینێن مەزن ژی روو دەن.
سەرۆک کۆمارێ تورکیا ئەو یەک ژی دیار کر، وەکو تورکیا چاڤێ وان ل ئاخا چو وەلاتەکێ نینە، بەلکو وان پێ باشە ل سووریێ داخوازیێن خەلکی ل بەرچاڤ بهێنە وەرگرتن و ل گۆر راستیا نوو پرسێن هەی بهێنە چارەسەرکرن، دڤێت ئەمریکا و وەلاتێن دی یێن جیهانێ ژی ل گۆر راستیا نها سەرەدەریێ ل گەل رەوشا سووریێ بکەن و تورکیا ژی ژ بۆ پاراستنا ئاسایشا خوە دێ یا پێدڤی کەت.
